Khawthlangtuipui chim chinin kum nga liam ta chhunga a san ber tum a thlen avangin Tlabung tiamin khaw 11-a chhungkaw 507-te chu hmun him lamah an inthiar chhuak.
Tui chim chin nghawng khawpa ruahtui a tlak tawh loh avangin nimin chhun lam atang khan Khawthlangtuipui chim hi chak vak lovin a tlahniam tan a, a chim san lai ber a thlen thleng khan Tlabung leh a chhehvel khaw 11-a chhungkaw 507-te chu hmun him lam panin an inthiar chhuak a, inthiar chhuakte zingah hian Tlabung khaw chhung bika chhungkaw 122 an tel a ni.
Border Security Force 163 battalion sipaite pawh an border outpost a chim avanga harsatnain a tlakbuak mek karah an huam chhung khaw hrang hrang chu an Commandant Krishna Kumar Singh ruahmannain Inspector Dinesh Kumar Meena hovin an tlawh kual a, tui lian vanga chhawmdawl mamawhte a remchan anga puiin anmahni tanpui hna an thawk a ni.
Tuna tui lian hi kum 2018 hnua Khawthlangtuipuiin a chim san ber tum niin, Tlabung Bazar Bungkawna hmun thenkhat a chim thleng hman a, tui lian vanga chhiat tawk chhungkuate chu Tlabung SDO (C) H Zonunmawia ruahmannain zirna in, vantlang hall, sorkar building remchang leh sakhaw thila punkhawmna hmun him laiah inthiar lutin, SDO (C) bakah Tlabung VC leh YMA Tlabung Branch-ten tui lian vanga harsatna tuarte hi a khat tawkin an tlawh deuh reng a ni.