Khawvela nau piang tawh zinga tê bera ngaih chu a pian atanga thla 13 zet Singapore damdawi ina intensive care-a enkawl zui a nih hnuah a chhuak ve ta.
Kwek Yu Xuan-i hi a pian tirh hian gram 212g (7.47oz) chauh niin apple pum khat ang vel a ni a, cm 24 chauhva sei a ni bawk.
A nu hian chawlhkar 25 vel chauh a pai a, a pangngaiah chuan chawlhkar 40 vel tal pai thin a ni.
Ani hmaa nau piang tê bera chhal chu United States-a mi, kum 2018-a gram 245 chauh kha niin University of Iowa-a Tiniest Babies Registry chuan a tar lang.
Yu Xuan-i hi a nuin thisen sang nasa tak, pre-eclampsia an tih a neih avanga a taksa peng pawimawh chhe mai thei dinhmuna a din avang leh amah leh naute tan pawha hlauhawm thei a nih avangin thla li vel zeta pai hun pangngai pai tling lovin hmanhmawh taka zai chhuah a ni.
Yu Xuan-i hi tunah chuan kg 6.3 a ni tawh.
Singapore-a National University Hospital (NUH) chuan naute hi a pian hlim kha chuan dam chhuahna chance a nei chhe hle tih a sawi.
Damdawi ina enkawl a nih chhung hian Yu Xuan-i hi enkawl dan chi hrang hrang leh khawl hmanga vil reng a ni.
Doctor-te chuan an enkawlna hnuaiah a hriselna a than a tha a, tunah chuan chhuahtir a ngamawm tawh niin an sawi.
Yu Xuan-i hian a chuap lamah erawh fel tawk lo a la nei a, inah pawh hian khawl hmanga a thawk a la ngai dawn a. NUH doctor-te chuan hei pawh hi nakinah chuan a tha mai dawn niin an sawi.
A nu, Wong Mei Ling chuan Yu Xuan-i a piana a len zawng leh a rih zawng a’n hriat khan, a fa hmasaa mipa a lo neih tawh nen a danglam em avangin a barakhaih hle tih a sawi.
An naute enkawlna tur sum hi an nei bik lo va; mahse, mipuiin pawisa thawh khawmin S$366,884 ($270,601) lai an thawh khawm a ni.