Aizawl : Azadi Ka Amrit Mahotsav kal zelah nimin khan Padma Shri pawh lo dawng tawh Dr. Laltluangliana Khiangte-in tawng chi hrang chi thum hmanga lehkhabu a ziak chu Larsap Dr Hari Babu Kambhampati-a’n Raj Bhavan-ah a tlangzarh.
Dr. Laltluangliana Khiangte lehkhabu ziak te hi – Hindi, English leh Mizo tawnga ziak te an ni a. Heroes and anti-Heroes (English Version), Mizo Nataak – 2 : Rani Ropuiliani (Hindi Version) leh History of Mizo Literature( Mizo Version) te an ni.
Larsap Dr Hari Babu Kambhampati chuan Lehkhabu thar pathum te chu lehkhabu satliah ni lovin hnam rohlu an nih thu sawiin, a ziaktu a fak a. Dr. Laltluangliana Khiangte kutchhuak te enin Mizo literature tana a thawhhlawk piahlamah Mizote chanchin, an huaisenna bakah ram leh hnam chhanna atana an inpeknate India ram hmundanga mi ten an hriat phah nia a hriat thu a sawi.
Lalnu Ropuiliani chanchin atangin mahni ram leh hnam hmangaihna, mahni hnam chhanna atana nun hlantute an ropuizia hriaa hlut a pawimawh zia te a lang chiang niin Larsap chuan a sawi a. Mizo thuziakmite zingah Hindi tawnga lehkhabu ziak emaw letling an tam loh laiin lehkhabu tha tak Hindi tawnga lehlin a ni chu lawmawm a tih thu a sawi bawk.
Lehkhabu ziaktu Dr. Laltluangliana Khiangte, Senior Professor, MZU-in lawmthu sawiin, lehkhabu tlangzarhna hun hi tan a ni a. Prof R. Thangvunga(Rtd)-in lehkhabu thlirlawkna hun a hmang a. Prof Dibakar Chandra Deka, Vice Chancellor pawhin thu a sawi bawk a ni.