Jammu & Kashmir-a Kulgam district-a BJP hruaitu leh khaw hotu, Ghulam Rasool Dar leh a nupui chu Kashmir chhim lam, Anantnag khuaah Thawhtanni khan mi firfiakten an that.
Dar-a hi BJP hnuaia Kisan Morcha district hotupa a ni a, a nupui nen hian Lal Chowk vengah mi firfiakten an kap hlum niin J&K BJP hruaitu, Altaf Thakur chuan news agency ANI hnenah a sawi.
An nupa hian hliam na tak an tuar a, damdawi in panpui nghal ni mah se an chhan thei ta lo.
BJP chuan he tualthahna an dem thu leh ‘a nunrawnthlak’ an tih thu an sawi.
“Pawisawi lo beih leh thah hian engmah a thlen lo va, mi firfiakte intar lanna mai a ni,” tiin Thakur hian a sawi.
“Pakistan-a mi dawihzep, mi firfiakten BJP mi, Ghulam Rasool Dar leh a nupui, Jawhara Banoo an that a. Dar-a hi August 5-a Kashmir hung bikna hlih champhaa India hnam puanzar pawt pharhtu kha a ni,” tiin BJP J&K unit chief Ravinder Raina chuan a sawi.
Dar-a hi Kulgam-a Redwani-a cheng niin khaw hotu (sarpanch/village chief) a ni a. Nikuma District Development Council inthlanah khan BJP hminga chuhin a tling lo.
An thah lai hian Anantnag-ah mi in luahin a cheng a ni.
Jammu & Kashmir Lieutenant Governor Manoj Sinha chuan pawi a tih thu leh beihna thlenga mawhphurtute chu a rang thei ang bera man chhuah an nih tur thu a sawi.
Chief minister hlui, National Conference hruaitu, Omar Abdullah chuan Dar-a thahna a dem thu leh a chhungte leh a thiante a tawrhpui thu a sawi.
J&K chief minister hlui thp, PDP hruaitu, Mehbooba Mufti pawhin Twitter-ah thil thleng a dem thu a tar lang.
“Vawiinah helhovin BJP district president leh a nupui an kap hlum tih ka lo hria chu pawi ka ti tak zet a. An chhungte leh anmahni lainattute ka tawrhpui tak zet a ni,” a ti.