Aizawl : Champhai District Skill Committee-in Nilaini khan Hnahlan Higher Secondary School-ah Skill Camp an buatsaih a. Hnahlan Higher Secondary School Principal Lalduhchhunga’n kaihhruaiin, SDC Champhai Moses Lalfakawma Tlau-in he camp hi a hmanpui.
SDC Champhai Moses Lalfakawma Tlau chuan zirlaite chu lehkahzir piahlamah engemaw tal thiam thil chhenfakawm tak neih tum turin a chah a. “Eng dinhmunah pawh ding ila, midangin min chhuhsak theih mai mai loh thiamna kan neih chuan keimahni bakah khawtlang tan pawh a tangkai dawn a ni” a ti.
Thiamthil nei tur chuan entawn tur dik entawn leh kawm tam te, thil hrang hrang tih kual chhin te, thil chik peih te a pawimawh thu SDC Champhai chuan a sawi bawk.
Resource Person Mahatma Gandhi National Fellow Prannav Dutta niin, zirlaite chu tunlai thiamna hmang tangkai turin a chah a. “Social media kan hman nasat mek lai hian hna zawnna atana hman tur internet-ah hian tam tak a awm” tiin, thiamnate certificate nen tangkawpa neih zel chu nakina hna hmuh awlsam phahna a nih theih thu a sawi.
Hnahlan VCP Lalremruata Cherput paw- hin zirlaite tana skill ca- mp buatsaih a nih avangin Champhai Bawrhsap James Lalrinchhana kaihhruai District Skill Co- mmittee hmalakna a fak a. Sorkar hna vang tak karah mahni inhaikaw thiam leh thiamthil hmantlak ngah apiang an vannei mai dawn nia a lan thu a sawi bawk.
Skill camp ah hian zawhna leh chhana hun te buatsaih niin, zirlaite leh zirtirtu te zawhna hrang hrang an zawt a ni.