Hawaii-a Maui thliarkara chawlh hmanna khaw lar tak, Lahaina chu ram kang nasa takin tuam mekin mi 36 vel an thi tawh a, mi sang tam tak an tlanchhe tawh bawk.
Lahaina khuaa chengte chuan an thil tawn chu ‘rapthlak tak’ a nih thu an sawi hlawm.
“Thelh hna thawh mek a ni chungin mi 36 ruang vawiinah ringawt hmuh a ni,” tiin Maui county sokar chuan Ningania thuchhuah an siamah an tar lang.
United States thliarkar state-a ram kang hi Thawhlehni hma taka intan tawh kha niin Maui-a mihring 35,000 chuang chengte chu an buai hle a. Chenna in, sumdawnna hmun leh hmun dang pawimawhte pawh dinhmun derthawng takah a awm hlawm niin Hawaii Emergency Management Agency chuan Nilaini khan a sawi.
Ram kang inman kai chak tak hi Hurricane Dora-in thlipui a kenin a pui tha hle bawk a, tlanchhiat tum mangang thenkhat chu tuipuiah an zuang lut tawp tawp a ni.
Social media-a video darhah chuan kangmei hian tuipui kam khua, mi 12,000 vel chenna, khualzinte tlawh tam hmun, Lahaina laili a kang lai pawh a lang a, a khu dum chhah tak pawh a inzial nasa hle.
“Chhiatna kan tawh ka hmuh tawhah chuan a la rapthlak ber a ni. Lahaina pum a kang darh a, chhiatna rapthlak ber ang mai a ni,” tiin mi cheng pakhat, kangmei atanga tlan chhuak, Mason Jarvi chuan a sawi.
Lahaina-ah hian in 270 chuang kang leh kang chhe vek a awm.
“Maui-a Lahaina zawng zawng a chhia a, chhungkaw tam tak baihvaiin an awm,” tiin Governor Josh Green chuan a sawi.
Hawaii Emergency Management Agency thupuangtu, Adam Weintraub chuan thil chhe laio vel chu indona lai hmun ang mai a nih thu Al Jazeera a hrilh.
“Vansang atanga thlalak kan hmuh thenkhat phei chuan Indopui II-na laia Dresden awm dan kha min hriat chhuahtir,” tiin a sawi a, tangrualten German khawpui an bomb chhiat vek a sawina kha a ni.
Ninganiah khan puihna dang an dawng bawlh tih a sawi a; mahse, kangmei hian hmun tam takah inbiakpawhna leh chetvelna a tibuai thung niin a sawi a, chhanchhuah hna leh mamawh inpek pawh a buaithlak niin a sawi bawk.
Nilaini thleng khan Maui-ah hian American Red Cross chuan mi 2,100 vel awmna an siamah an kawl mek a, mi dang chhanchhuah tumin an bei zui zel.
“County, American Red Cross leh Honolulu county-a kan thawhpuite nen min tlawh mektu leh Maui thliarkara chengte puih hna kan thawk mek zel a, an awmna tur leh an zinna tur kan ngaihtuahsak zel,” tiin Weintraub chuan a sawi.