Tun nipui player bazar a ngaihven hlawh ber zing ami a ni a. Premier League a record siam thei dinhmun a ding in ram dang a pan mai dawn niin a lang.

Tottenham Hotspur chuan an captain leh striker rinrawl Harry Kane lei dilna an hnawl nawn fo hnuah German champion Bayern Munich hnen atangin Euro maktaduai 100 chuanga lei dilna an pawm a. Club pahnihte inbe rem tawhin player lama tihfel a nih chuan Bundesliga club a zawm ang.

Kum 30 mi Kane hian Spurs hnenah kum khat contract a la nei a, ziah belh a tum tawh lo nia sawi a ni fo. A hmalam hun chungchang hian sawi a hlawh thin a, amah pawh hian trophy lak theihna club zawm a duh niin a sawi thawi tawh thin.

Spurs in free transfer a hloh an duh lova, hei vang hian sum tam tak tel a hralh chu an phal. Tunah amah Kane hian a cham zui dawn nge chhuah a thlang zawk dawn tih thutlukna a siam a ngai.

Chiang zawkin

Tun nipuiah striker mamawh Manchester United, Paris Saint-Germain leh Bayern Munich te nen sawizawm a ni vek, nimahsela German club chiahin ngawrh takin an umzui ngam.

Bayern Munich hian Spurs hnenah lei dilna tum thum an siam chu hnawl a nih hnuah inbiakna chhunzawm zelin an lei dilna hnuhnung ber pawh hnawl a ni a, nimahsela indawr chhunzawmin tunah inremna an nei. German champion hian player dang an melh tawh dawn tih an tihchian avangin Tottenham an ngawi reng ta bik lo.

Tottenham chairman Daniel Levy chuan a player chhuanvawr hi chelh tumin kumtin theihtawp chhuah fo mahse kuminah a hlawhtling zo dawn lo niin a lang a, an dinhmun pawhin a zir lo.

Levy hi club neitu ENIC International hotu Joe Lewis chuan man nei a hralh theihlai a hralh mai turin a lo ti tawh bawk a, club hotuten a man tel lova chan an tum lo.

Hetihlai hian a insawn dawn em tih chiang taka sawi theih a la ni bik lo.

Tun nipui tan tir lamah German champion hnena kal hi a duh nia thuthang a tam. Mahse tunhnaiah Spurs a cham zui zel lam a hnaih tawh zawk nia sawi a rawn tam leh a, hei vang hian Bayern pawhin uluk taka an sawm a ngai ang.

Record nge trophy?

Tottenham chherchhuah striker hi Premier League chanchin a goal khung hnem ber pahnihna a ni mek. Alan Shearer a goal 260 khung chu goal 48 chiahin a pha lova, 213 a khung tawh.

Season tina a goal khung dan thlirin season hnih chhungin record siam mai tur niin a lang. Hei hian Kane-a rilruah hmun pawimawh a luah lo thei lo.

Kum 2015-16, 2016-17 leh 2020-21-ah te Premier League Golden Boot a dawng tawh a, league goal 30 a khung tlin tum hnihah a dawng pha lo zawk bawk.

Tottenham manager Ange Postecoglou chuan club a ruahmanna a neih dante Kane hi a sawipui vek tawh a, cham turin a duh. Hei bakah English club zingah nakkum nipui a free transfer a chuh na tak tak an awm dawn tih a chiang. A tan thutlukna lian siam tur a awm.

Lehlamah Tottenham tana match 435 atanga goal 280 khungtu hian trophy lian engmah a la la lo. Amah sawmtu Bayern hi Bundesliga-ah a zawna season 11 champion thei, Champions League a vawi ruk champion tawh leh German Cup vawi 20 la tawh an ni thung.