European football season thar tan a ni dawn tawh a, club tinte nasa taka an inbuatsaih laiin thenkhatin inhliam avanga buaina an nei nghal.
Club hrang hrangten season bul tan thei lo tur player an nei nual a, heng zingah hian Real Madrid goalkeeper rinrawl Thibaut Courtois leh Aston Villa midfielder Emiliano Buendia te an tel.
Kum 31 mi Belgium international goalkeeper hian a khup veilam chu training-ah a ti na a. A hliam hi enfiah a nih hnuah ‘cruciate ligament’ a ti na tih hmuh chhuah a ni a, zai a ngai dawn.
Real Madrid tana vawi 230 inkhel tawh Courtois hi nikum Ballon d’Or lawmman semnaah goalkeeper tha ber chawimawina hlan a ni a. Kum 2018 khan Real hi zawmin La Liga vawi hnih an hnena a cham chhungin a la tawh.
Real hian a chawlh rei chhung tur sawilawk thei lo mahse ACL hliam hi a rei lo berah thla ruk vel tal chawlh ngai an ni thin a, hei vang hian a chawl rei dawn.
Blancos hian hei vang hian a hmunruak luah turin goalkeeper an dap dawn nia sawi a awm a, Spanish goalkeeper David de Gea nen sawizawm an ni nghal.
Kum 26 mi Buendia hi Nilaini training khan inhliamin a khup a thafei awm a ti na tih hmuh a ni a. Khup lam specialist hnuaiah enkawl niin zai a ni dawn em tih hriat ni lo mahse a chawl rei dawn a, Villa hian Italian playmaker Nicolo Zaniolo an ngaihven nghal ve bawk.