Supply Minister K Lalrinliana’n sorkar kum kal lai mek, kumin 2023-2024 chhung Mizoram sorkarin buhfai qtl 3,68,963.20 a lei tawh tih sawiin, monsoon stock avang hian fur khaw chhiat avangin ram chhungin buhfai tlakchham avanga nunna chân an la awm lo tih a sawi.
Aizawl Press Club-a thu thar thehdarhtute a kawmnaah K Lalrinliana chuan nimin khan Food, Civil Supplies & Consumer Affairs Department-in an hmalakna hrang hrangte a sawi fiahin, furpui lo thlen laia mipuiten ei leh bar an tlakchham loh nan buhfai mamawh tur ang zatte chhekkhawl lawk thin a nih thu a sawi a. Kum 2019 atanga kum 2022 chhung khan sorkarin supply centre thlak bikah monsoon stock buhfai qntl 9,88,781.84 chhekkhawl a ni a. Kumin bikah centre 75 ah buhfai qntl 1,94,506.01 chhekkhawl a ni tiin, “He monsoon stock avang hian fur chhiat lai pawhin Mizoram chhungah ei leh bar tlakchham vanga riltama thi vawiin thlengin tumah an la awm lo,” a ti.
Supply minister hian AAY chhungkuate hnenah January, 2019 atanga vawiin thlengin chini (sugar) thla tin chhungkaw khatah a man tlawm, kg 1 zelah Rs 24-in a sem thin thu a sawi a. Kum 2020 atang khan chini supply-na rate hi qntl khatah Rs. 4,500-a tihsan a ni a, tunah hian sorkarin AAY te hnena chini a peknaah hian qtl. khat zelah Rs. 300 zel a tum thin tih a sawi.
Gas home delivery chungchang sawiin K Lalrinliana chuan, September, 2019 khan pilot project angin College veng, Aizawl ah kalpui tan a nih thu a sawi a. Tunah hian IOCL LPG Connection nei tupawhin online booking an tih chuan gas agency ten consumer-te kawt kaiah ngei an thlensak tur a ni tih chu dan ding lai a nih thu a sawi.
K Lalrinliana chuan gas agent te hian an huam chhung theuha consumer-ten an book atanga darkar 48 chhungin an deliver tura tih a nih thu sawiin, “Hetianga kalpui thei lo agent an awm anih chuan consumer-te hian IOCL-ah emaw, supply department-ah emaw, lungawi lohna an thlen thei reng a. Consumer hnen atanga agent-te hian lungawi lohna an thlen hian company lamah an record a tha dawn lo a, an tuar let thei a ni,” a ti.
Supply minister hian Sairang Sihhmuiah rel-in a chawm tuialhtheih chhekkhawlna Rail-fed Oil Depot hmunpui tur kum 2019 atang khan buaipui tan a nih thu a sawi a. IOCL-in a duh ang Sihhmui, Sairangah ram, 24 acres leh 7 Acres vela zau chu a remchang bera ngaih niin, tunah hian a ram hi lak tur a ruahmanna kal pui mek a ni a. Oil Depot siam tur hi cheng vaibelchhe 500 man hu vel project tur niin, oil dahkhawlna tur tank lian pakua siam a ni dawn a, kilo litre 15,000 dah khawl thei tur a ruahhman tur a nih thu a sawi.
Mualkhang bottling plant tihlenna tur hian kum 2021 khan IOCL hnenah ram acres 2-a zau lei fel a nih tawh thu sawi bawkin, tuna gas bottling plant siam thar tur hi kum khat a metric tone 30,000 siam chhuak thei tur a duan a nih thu leh thla 24 chhung a siam zawh tur a ruahman a ni. A project hi Rs vbc 194 man hu tur a duan a nih thu a sawi bawk.
Muanna godown sawn chhuah nan 3,000 metric ton leng godown sakna tur ram chu Sairanga Chengkawl lui kam 14.69 bighas a zau, 3,000 MT dawng thei tur, FCI Godown sak lai mek bula mi chu thlan niin, godown hmun leina leh sakna atana sorkarin sum a ruahman Rs 700 lakh atangin a hmun leina atan Rs 300 lakh hman a ni a. Rs 400 lakh chu godown sakna atana hman tur a nih thu a sawi.
K Lalrinliana chuan Assam nena ramri buai Mizoramin a neih laiin thenawm state-a Zohnahthlak unauten gas leh tuialhtheihah harsatna a tawk lohna atan an puihna dawn nasat thu a sawi a. Ramri buai avanga Assam lamin kawng an dan avangin Manipur atanga gas leh tuialhthei phur tur an intirh thu sawiin, “A kal turten an huphurh khawp mai a, hel pawl in gate-a pawisa pek turte kan inpai a. Mahse, gate-a pawisa pek a hnekin thingpuite an lo lum sak zawk a ni,” a ti.