Aizawl: Mizoram Pradesh Congress Committee (MPCC) chuan kum 2023-a Mizorama mihring awm tur zat (projected population – 13,70,000) atanga chhut chuan nau piang hlim pawhin Rs 98,958 leiba nei ang an nih thu a sawi.
Ningania Aizawl Press Club-a thu thar thehdarhtute an kawmnaah Congress thupuangtu Dr Lallianchhunga chuan India rama ni tin chanchinbu rintlak ber zinga ngaih, The Indian Express-in August 1, 2023-a a tarlan danin, Mizoram chu state sum thawhchhuah atanga chhutin India ram state leh union terrritory zingah leiba ngah ber a nih thu a sawi.
Dr Lallianchhunga chuan Mizoramin state a nih, kum 1987 atanga kum 36 chhunga leiba a neih chhoh zel tlingkhawm leh MNF sorkarin kum nga chhung leka leiba a neih belh zat hi a intluk thuak tawh tih sawiin, “Hetiang khawpa leiba pung chak hian Mizoram sorkar hi a la awm ngai lo,” a ti.
Leiba rulh nana leiba dang a insiam belh zel avangin Mizoram chu MNF sorkar hnuaiah leiba thang (debt trap) ah a tang mek a. Sorkar lo awm leh tur tan pawha rulh huphurhawm tak, chet tiharsa tham leiba an hnutchhiat ngei dawn tih a sawi bawk.
MPCC thupuangtu chuan kumin budget-a Mizoram leiba tur zat a chhut chu Rs. vbc. 13,557.32 a ni a. Kum 2023-a Mizorama mihring awm tur zat (projected population – 13,70, 000) atanga chhut chuan nau piang hlim pawhin Rs. 98,958 leiba nei ang an ni tih sawiin, “MNF sorkar hian budget a leiba zat tura chhutlawk (budget estimate) aia tam leiba kum tin a nei ziah a, chuvangin nausen piang hlim atanga puitling leiba zat hi a tak takah chuan hei aia tam a ni ang,” a ti.
MNF Sorkar hnuaiah hian MNF MLA fel tak tak awm mah se, a lu ber chief minister enkawlna hnuaiah thil tha lo an hriat pawh an dodal ngam chuang loah puhin Dr Lallianchhunga chuan, “An mit hmuh lai ngeiin Mizoram chu leiba thangah a tang ta mek a ni. Tawngkam thiamna ringawtin ram min hruai tha lo tih hi Mizoram mipuiin a takin kan hre mek a. Leiba thanga tang mek Mizoramin a mamawh ber chu ram hruaitu – sum leh pai enkawl thiam, enchhin pawh ngai lo, mi rintlak leh mi dik a ni,” a ti bawk.