Aizawl : Mara Thyutlia Py (MTP) General Headquarters, Siaha hruaitute’n nimin khan Larsap Dr Hari Babu Kambhampati chu a chenna Raj Bhavan-ah an kawm a. Mara Autonomous District chhunga hmalakna thenkhat leh bawhzui ngai nia an hriat te an sawipui.
MTP hruaitute hian hun rei tawh tak chhung chu MADC area-a thalaite zingah sipai-a tling an tlem chu veiawm an tih thu an sawi a. Tun hnaiah sipai lak runpui awm thinah Siaha district thalai te an tlin ve theihna tura kawng zawn sak turin an ngen.
Hei bakah General Nursing & Mid-wifery School, Siaha sak hna thawh mek chu hun rei tawh tak atanga ngaihsak hlawh tawh lo, he institution pawimawh tak hi kuminah sak puitlin a nih ngei theihna tur leh Nursing School anih anga kalpui a nih theih nan hma laksak turin an ngen bawk.
MTP aiawhin President Pakhaw Choza leh Asst. General Secretary N. Solomon Beihlotha te’n larsap hi an kawm a ni.