Aizawl: Synod Office-a thawktuten nimin zing an devotion-ah National Protest Day an hmang a, Synod Moderator-in hun a hmang a, Dalit Kristian leh Muslim-te tan tawngtai rualna hun hman a ni bawk.
National Protest Day hi Dalit Kristiante leh Dalit Muslim-ten an chanvo tur, Kristian emaw, Muslim emaw an nih avang ngawta hamthatna an chân tak loh duh lohzia lantir nana hman thin a ni.
Kum 1950-ah khan Scheduled Caste chungchangah India ram president-in thupek tha lo tak a chhuah a, ‘Dalit-te chu Hindu sakhua ni lo, Kristian emaw, Muslim emaw-ah an inleh chuan Scheduled Caste-ah chhiar tel an ni thei lovang’ tiin. He dan avang hian Dalit Kristian leh Dalit Muslim-te chu Scheduled Caste-ah telh an ni ve ta lo va. Chuvang chuan hnam hnuaihnung an nih avanga an chanvo leh hamthatna zawng zawng an hloh fai vek a ni.
He dan hi mipui hriat tura puanzar a nih atang khan Dalit Kristian leh Dalit Muslim-te chuan kum tin August 10 hi National Protest Day-ah an hmang ziah thin a ni.