West Ham United in tun nipui player bazarah thawm ngah mahse chet mai an la nei lo. An player lakluh hmasak ber ni turin Mexico midfielder Edson Alvarez chu Ajax Amsterdam atangin an lalut.
Kum 25 mi Alvarez manah hian Pound maktaduai 35 vel an seng a. Mexico in tun nipui a CONCACAF Gold Cup a an champion-na kawngah team khaipa ber a ni.
Hammers hian season liamta a Europa Conference League a champion puitu captain Declan Rice chu Pound maktaduai 105 in Arsenal hnenah an hralh a, a hmunruak hnawhkhattu bakah an squad tihhmasawnna tur player lakluh an duh.
Alvarez hi chumi kawnga an player lakluh hmasak ber chu niin, “Ka football inkhelh chhunga hun pawimawh ka thleng a, kei leh ka chhungte tan chuan duhthusam duhawm tak a ni.”
“Premier League hi league danglam, khawvela league ropui ber a ni a, ka inkhelhdan nen a inmil hle ang. West Ham-ah hian mawhphurhna ka nei tawh a, he kawr ha chung hian theihtawp ka chhuah dawn a ni.” tiin a sawi.
Manager David Moyes chuan, “Kuminah midfield hi tihchak kan ngaihzual a ni a, Edson hian hemi kawngah hian nasa takin min pui ang.” a ti.
West Ham hian Manchester United atangin Harry Maguire leh Southampton atangin James Ward-Prowse te an lalut dawn bawk.