Algeria-a an khawpui khawchhak lam khua leh a bul hnaia ramngaw nasa taka kang avangin mi 42 vel an thi tawh a, an zinga mi 25 chu mi chengte chhan chhuah tuma thawk chhuak sipaite an nih thu president chuan a sawi.
President Abdelmadjid Tebboune chuan Thawhlehni zan khan Twitter-ah Kabyle region-a khaw pahniha ram kang vanga tang mi 100 chhan chhuah tuma thawk chhuak sipai thite chu martar an nih thu a tar lang.
Kabyle hi Africa hmar lam rama Berber hnam chenna lai a ni.
Sipai 11 velin hliam an tuar bawk a, an zinga pali chu an dinhmun a tha vak lo niin defence ministry chuan a sawi.
Prime Minister Aimene Benabderrahmane chuan sorkar TV-ah civil mi 17 an thi tih a sawi a, a hmaa pasarih atangin an pung chak hle a. An chanchin kimchang erawh a sawi lo.
Tlangram, Kabyle hi Algiers atanga km 100 vela hla niin a chhengchhiat avangin tlawhpawh a hautak a, khua a lumin tui a vâng hle bawk.
Khuaa cheng tam tak an tlanchhia a, thenkhat erawh chuan ram kang thelh tumin an bei a. Bucket, thing zar leh hmanraw dang an hmang a. Tui phur thlawhna an nei lo.
Thi leh hliam tam ber hi Kabyle khawpui, Tizi Ouzou-a mite niin tlang bulthuta mi a ni a. Mediterranean Sea kam, Bejaia-ah thi leh hliam an awm nual bawk tih president chuan a sawi.
Prime minister chuan sorkar TV-a thu a sawinaah venhim hna thawktuten an hmuh danin Kabyle-a ram kang hi hal luih a ang a, sualna vanga thleng nia a lan thu a sawi.
A hmain Interior Minister Kamel Beldjoud chuan Kabyle hi tlawh tawhin ram kang chu hal luih a nih thu a lo sawi tawh bawk.
“Hmun khata a ruala hmun 30-a kang hi thil thleng palh theih a ni lo,” tiin Beldjoud hian sorkar TV-ah a sawi a, tumah a haltu man erawh an la awm lo.
Sipai an thih tam em em dan hi sorkar chuan a sawi fiah lo va. Liberte ni tin chanchinbu website chuan sipai pakhatin a dara a silai a ak chunga suahdura lei ruta mei a thelh lai an tilang.