Nepal chuan Indian tlanglawnmi pahnih leh an team leader chu kum 2016-a Mt Everest lawn chhuak anga insawia an lawn chhuah si loh avangin kum ruk chhung an ram chhunga tlang lawn thei lo turin an hrem.
Narender Singh Yadav leh Seema Rani Goswami ten tlang an lawn chhuah hi a hun lai hian tourism department pawhin a pawmpui (certify).
Dawt sawiin an lo lawn chhuak lo tih hi Yadav-a zawk chawimawina dawng tura chhawp chhuah a nihnaah finfiahna phawrh tur tha a neih loh avangin hrem an ni.
Yadav leh Goswami hian hremna an tawrh tur chungchangah hian engmah an la sawi lo.
Khawvela tlang sang ber, metre 8,848.86 (29,032 ft)-a sang Mt Everest lawn chhuah hi tlanglawnmi tan chuan hlawhtlinna ropui ber a ni.
Yadav-a hi nikum khan Tenzing Norgay Adventure Award dawng tura chhawp chhuah a ni a; mahse, a thiannu nen hian an lawn chhuak tih finfiahna tha tawk phawrh tur an nei loh avangin tlanglawnmi dangten an sawisel.
Nepal tourism ministry thuneitu pakhat chuan an chhuinaah tlanglawn ve dangte angin tlang chhip an thleng ngei tih finfiahna tur thlalak leh thil dang engmah phawrh tur an nei lo tih AFP hnenah a sawi.
“Kan chhuinaah hian an lawn chhuak nia an finfiahna lehkha (thlalak pawh tel) chu uluk takin kan zir a. Heng lehkha lem an thehluh leh thuneitute bakah sherpa (tlanglawnmi hruaitu Nepalese-te) nen kan inrawn hnuah hetiang thutlukna hi kan siam ta a ni,” tiin Nepalese tourism & culture ministry-a thuneitu sang pakhat chuan The Indian Express hnenah a hrilh.
Yadav, Goswami leh an team leader Naba Kumar Phukon chu kum ruk chhung atan hremna pek an ni ta a. Hremna hi kum 2016 atanga chhiar tan kha niin Everest an lawn chhuak tih lantirna certificate pawh hnuh kir nghal a ni tih AFP chuan a tar lang.
Tourism ministry hian an tlanglawnna huaihawttu company leh anmahni pui sherpa-te pawh pawisa an chawitir bawk.
Kum 2017 pawh khan Maharashtra, India-a police officer nupa pawh Indian zinga nupaa Everest lawn chhuak hmasa ber anga insawiin an lo lawn chhuak tak tak si lo va, an hna atanga bântir nghal an ni.
Dinesh leh Tarakeshwari Rathod te nupa hian kum 2016 khan an lawn chhuak niin an insawi a; mahse, Maharashtra police chuan ringhlelin thlalakte an lo siam danglam mai mai a ni tih an hmu chhuak.
Nepalese tourism department chuan he mite nupa hi an lawn chhuak tih an pawmpui hman a, a hnuah an sut leh.