Spain hmeichhe team in an la dai ngai loh ram an dai a, FIFA Women’s World Cup semi-final a vawikhatna a khel tur niin Netherlands lakah extra time hnehna an chang.

Zirtawpni khan Wellington Regional Stadium-ah Spain tan tleirawl winger Salma Paralluelo chuan minute 111-naah an chakna goal a khung a. Netherlands lakah 2-1 in an ram a chakpui.

Spain tan hian Mariona Caldentey chuan minute 80-naah penalty atangin an hmahruaina goal a khung a. Stefanie van der Gragt hand ball avangin an chak mai dawn a ang.

Mahse veteran Van der Gragt chuan a tihsual a nawtreh. Huntawp dawn minute 91-naah an si phurh sutna goal a khung a. Dutch nulate an lawm.

Extra-time ah erawh inkhelh chhunga hun tam zawk a chan tha zawk changtu Spain in chakna goal an khung.

Kum 19 mi Paralluelo in tawnhriat nei tha Jennifer Hermoso ball pek chu penalty area chhungah la in World Cup a Spain tana goal khung thei naupang ber ni turin a khung mawi hle.

Netherlands hian second half-ah Irene Paredes foul avangin penalty an hmu zet a, mahse VAR hmanga sut a ni. A hnuah VAR hman hnuah penalty an chawi leh si avangin an tuar na zual ang.

Dutch manager Andries Jonker chuan, “VAR khan a tih tur dik takin ti lo mahse Spain khan chak an phu e.” tiin a sawi zui.

Spain coach Jorge Vilda chuan, “Extra time kan khelh ngai mahse he team hi a beidawng ngai lo. Kan player-te zawng zawngin theihna sang tak an lantir a, kan inkhelah hian thutlukna langsar tak tak tam mahse kan result a lawmawm a. Goal khungtu Salma pawh kan lawmpui.” a ti.

An hmaah Sweden

Kumin World Cup a che tha, European team thahrui ngah leh ball thiam Sweden in an chetthat chhunzawmin Japan an haw tir a, World Cup semi-final an khel dawn.

Group stage leh round of 16-ah an chetthat em avangin Japan hi final lut thei tura tam tak ngaih an ni. Mahse Sweden in Amanda Ilestedt hmanga first half a goal an khung hnuah Manchester City midfielder Filippa Angeldahl chuan penalty atangin an goal hnihna second half-ah a khung.

Japan in minute 76-naah penalty an hmu a, Riko Ueki chuan goal bar a pet per. Honoka Hayashi hmangin huntawp dawnah goal khat an khung a. Aoba Fujino chuan freekick atang goal ban pet per bawkin Japan in goal an khung teuh thei.

Sweden coach Peter Gerhardsson chuan,”Kan result hi duhawm tak a ni. He inkhelah hian hmuhnawm turin engkim a awm. Tun tournament a kan khelhthat ber a la ni a, Japan hi team tha berte zing ami an ni.” a ti.