Aizawl: BJP Mizoram President Vanlalhmuaka chuan India hmarchhak buaina zawng zawng leh mipuite tawrhna tobul chu Congress party puhin, MPCC President Lalsawta chu Mizo mipuite chungah ngaihdam dil turin a phut.
BJP in nimin khan an party pisa-a ‘Partition Horrors Remembrance Day’ hun an hmanah thu sawiin Vanlalhmuaka hian, tun hnaia Congress President Lalsawta’n BJP sorkar paih thlaa BJP thlipui do let tura political party zawng zawng intelkhawm tura a sawmna bakah, kohhran leh NGO zawng zawngte a sawm chu political party thi tur chalchang au aw a ni tih sawiin, “Politics khel tura kan ngaih loh kohhran leh NGO-te hial politics-a kaih luh an tum hi an mize tha lo tih lanna a ni,” a ti.
MPCC president-in India ram pum mai bakah, a bikin Mizoramin hma hun thim leh khirh tak a tawng mek tih a sawi chu Mizo mipui hruai kawi tumna a nih thu Vanlalhmuaka chuan sawiin, “Mizorama hun thim leh khirh kum 20 chuang thlen tirtu chu Congress, Pi Indira Gandhi kaihhruai hi a ni a. Mizoramah hian hun thim leh khirh tak kan hmabak mek a nih chuan Mizoram min lo kaihhruai tawhtu Indian National Congress (INC) leh tuna sorkarna chelh mektute vang a ni,” tiin, Lalsawta hian history chhiar let se, a awmna Congress party aiawhin Mizo mipuite chungah hian ngaihdam dil a phut thu a sawi.
INC chu India rama sakhaw inlehna dan siam tawhtute an nih thu leh bawng talh khapna dan state 22-a siamtute an nih thu te, Kristiante bitna state Mizoram leh Nagaland mi pawisawi lo dimna nei lova sawisatute, jet fighter leh bomb hmanga Mizoram bei tute an nih thu te, hmarchhak state Armed Forces Special Powers Act siamtute an nih bakah, hmarchhak rama buaina zawng zawng leh mipuite tawrhna zawng zawng tobul chu Congress an ni tiin Vanlalhmuaka hian a sawi bawk.