Cyber Crime Police chuan nimin khan Aizawl Press Club-ah Mizoram Journalists’ Association (MJA) member-te chu Cyber Crime chungchanga inztirtirna neih a ni a. He huna tar lan a nih danin, internet kaltlanga inbumna avanga sum hloh Rs nuai 300 chuang a tling tawh.
He huna zirtirtu Inspector MS Dawngliana sawi danin, Mizorama pawisa kaihhnawiha inbumna a tam ber a. Chung zingah chuan video call hmanga inbumna te, bank manager nia insawia inbumna te, online shopping hmanga inbumna te, phone leh hmeichhiat mipatna hmanga inbumnate, social media-a inchirthehna te leh thlalak thehdarha intihhmingchhiatna a hluar hle a. Black market-a SIM card hman thlenga fimkhur a ngaih thu a sawi.
Mizoramah internet kaltlanga inbumna avangin thubuai theh lut awm tawh zat chu Rs nuai 300 chuang a nih tawh thu sawiin MS Dawngliana chuan, heng zingah Rs nuai 24 vel chauh lak letsak tawh awm tawhin, inbumna avanga sum an lak letsak theih chu zaa 10 pawh a la tling lo tih a sawi.
Zawhna chhangin MS Dawngliana chuan, internet kaltlanga pawisaa inbumna thubuai chin fel a harsat thu sawiin, “Bank account thalh avanga buaina tawk an tam ber a. Mi thenkhatin pawisa tlem tein an bank account an hralh thin a ni,” a ti.
Cyber Crime unit din a nih atang hian zahmawh rawngkaia kumtlinglo (child pornography) thawn darh leh kawl thubuai 2,000 chuang siam a nih tawh thu a sawi bawk.
MS Dawngliana chuan mi bum chingte hian kawng hrang hrangin remchang an dap reng avangin mipuite tan fimkhur a tul thu a sawi.
He huna tar lan a nih danin, Cyber Crime bawhchhiat avangin mi 58 vel man an ni tawh a ni.