India Prime Minister Narendra Modi chun a sorkar rintawk lohna awm chu ni thum zet parliament-a sawiho a nih hnuah buk niin hnehna a chang.
Sorkar buk a nih hmain Modi-a kaihhruai BJP leh a thawhpui tangrual sorkar hian member an ngah zawk avangin hnehna chang tura ngaih sa an ni hrim hrim.
Modi-a chuan a sorkar ringtawk lova vote thlak ngaia eptute an che chuan ‘India a tihmingchhia’ tiin a puh.
Eptute hian vote thlakah hian an hneh dawn lo tih an hre sa a; mahse, Manipur-a chi leh chi inkara tharum thawhna thleng mekah awka chhuahtir an tumna avangin rintawk lohna hi an pu lut a ni.
Hmarchhak state-a May thla tir atanga buainaah hian mi 150 chuang thi tawhin mi sang tam tak baihvaiin an awm phah mek a. He thil hi he state-a mi cheng tam ber, Meitei leh a tlem zawk, tribal Kuki inkara buaina a ni.
Modi-a hian a ram chhung state pakhata buaina hi engmah a sawi chhuak duh lo va, hmeichhe pahnih saruaka khawlaia kalpui video a darh hnu, khawvelin a dem rawn a thlen hnuah aw a chhuah ve chauh a ni.
July 20 atanga tan parliament session-ah pawh hian eptute chuan Modi-a hian he tharum thawhna thleng chungchang hi sawi se tiin nasa takin an nawr a ni.
Ningania sawihonaa Modi-a a din chhuah hian darkar khat chuang thu a sawi a, hetah pawh hian Manipur a sawi ri chuang lo va, eptute thinrim chu rorelna in atangin an chhuak tau nghe nghe.
Hemi hnua darkar hnih chuang thu a sawi lehnaah erawh Modi-a hian sorkar laipui leh state sorkar chu buaina chhuahna state-a nunphung a pangngai leh theih nan theihtawpin an thawk dun tih erawh a sawi zui.
“Manipur mipuite hnena pawh he rorelna in hi an tan a awm reng tih ka hrilh duh a. Inlungrualin he chona awm mek pawh hi kan ching fel dawn a ni,” a ti.
Eptute chu Manipur-a thil thleng mek chu ‘politics khelh’ nan an hmang tiin a sawi bawk.
“India mipui an ring zo lo va, India theihna an ring lo,” a ti a. “He sorkar rintawk lohna put luh hmang hian Indian-te inrintawkna neih chu a tichat a ni,” a ti.
Tun tum hi kum 2014-a thuneihna a chan hnua Modi-a sorkar rintawk lohna a luh vawi hnihna a ni.
Kum 2018 khan chhim lama Andhra Pradesh hnena special category status pek chungchangah rintawk lohna hi a lut tawh a, darkar 12 sawiho a nih hnua bukah hnehna a chang tho a ni.