Liverpool chuan British football a player manto ber ni turin Brighton & Hove Albion midfielder Moises Caicedo chu Pound maktaduai 111 in lei an dil a, a club lamin an pawm.

Nimahsela an lalut thei dawn em tih a chiang lo. Chelsea nen intlansiak mek an ni a, player hian Merseyside pan a duh lo niin sawi thawm a awm.

Chiang zawkin

Brighton hian Caicedo man hi Pound maktaduai 100 chuang an chhiar a,Chelsea nen hian hun engemaw chen indawr tawh mahse Blues hian Pound maktaduai 80 a an dawrna chu a sang ber a la ni rih.

Liverpool in Chelsea chetkhalh tumin lei dilna sang tak an siam a, Brighton in an pawm. Nimahsela kum 21 mi hian Chelsea a kal a duh zawk. Stamford Bridge lama insawn turin rilru a lo siam tawh a, thlak a tum lo niin thu a thang.

Zirtawpni khan Liverpool manager Jurgen Klopp chuan, “Brighton nen inremna kan nei tih hrilh ka ni.” tiin Caicedo lakluh tumna chungchang a sawi a. Nimahsela medical a neih hun tur a la hre lova, player nen inbiakna pawh an la nei lo tih a sawi.

Liverpool hian Zirtawpni ah hian Merseyside-ah Caicedo medical neihna tur an ruahman a, mahse player in kal a duh loh avangin London-ah a la awm a. Brighton hotute hnenah tun nipuia amah umzui ngawrh bertu Chelsea chauh zawm a duh thu a hriattir niin thu a darh bawk.

Hetihlai hian Blues hian Liverpool in an ngamna zat ang hian an ngam ve dawn em tih hriat a la ni lova, Pound maktaduai 100 a kai erawh an hreh lo niin chanchinbumite chuan an sawi a. Leeds United atanga Tyler Adams an lakluhna tur chu Caicedo lakluhna a insawrbing an duh avangin an ti tlang dawn lo niin an sawi tel.