India leh China chuan thla kua vel zet Himalaya tlangdunga an inrina laia an inep hnuah an buaina ching felin an sipai dahte pawh an hnuk kir tan ta.
Indian defence minister chuan Ladakh-a Pangong Tso dil chhehvela ram pahnihten sipai an dah chu an hnuk kir ve ve tih sawiin hei hi inbiakna vawi tam an neih hnuah tih a ni tih nimin khan a sawi.
Hetiang deuh bawk hian Nilaini khan China pawhin a lo puang tawh.
India leh China hi April thla vel atang khan ramri-ah hian an inep tan a. June 14 zana an inpek suala Indian sipai 20 an thih hnuah khan boruak a tang zual.
Defence Minister Rajnath Singh chuan parliament-a rorel inkhawm neih mekah September atang khan remna a awm theih nan sipai leh ram palaite an inbe reng tih a sawi.
Sipai lal ve ve chu vawi kua inbiain, “Pangong Tso Lake kam chhim leh hmar lama sipai dahte hnuk kir turin kan inti ve ve,” a ti.
Chinese Ministry of National Defence thupuangtu pawhin Nilaini khan Pangong Tso dil atanga sipai hnuk kir tur hian inremna neih a nih thu a lo sawi tawh a. Colonel Wu Qian chuan an sipaite hnuk kir tur hian sipai commander-level-a inbiaknaah remna siam a ni tih a sawi bawk.
Indian leh Chinese sipaite hi dil chhim leh hmarah hian an inchhawp nghuk a, helai hmun hi an ram chin ve vea an chhal a ni.
Singh chuan parliament-ah hian China-in Ladakh-a ram inrinaah sipai thahnem tak bakah an hmanrua leh lirtheite a chhawp teuh tih a sawi a. India ram chhung chin sq. km 38,000 zet an luah bawk niin a sawi.
China erawh chuan a hma atang tawhin India puhna hi a pha a; mahse, June thlaa thlalem atanga thlalakah chuan China hian Galwan lui kam velah bunker an siam a, puan in an kaih a, sipaite hmanrua chhekna tur hmunte pawh an siam tih a lang thung.
Ram pahnihte hian km 3,440 zeta thui ramri, Line of Actual Control (LAC) an tih chu an intawm a. Ramri hian lui, dil leh vurin a khuh tlangte a kaltlang avangin a insawn duh hle a. Tun hma pawhin ram chin indaisaka inpuhin khawvela sipai ngah ber ram pahnih hi hmun hrang hrangah an lo inchaltauh fo tawh.
June thlaa an inphek sualna erawh kum 1975-a tharum an thawh lehna hmasa ber a ni a. Tiang leh kutlawnga insual an ni a. China lamah pawh thi leh hliam an awm nual nia sawi a ni a, anmahni erawh chuan engmah an sawi lo.
January thlaah mai pawh khan hmarchhaka Sikkim-ah an lo intithiam lo deuh tawh bawk a, hei erawh chinfel nghal thuai a ni thung.