Aizawl: Aizawl North II bialtu MLA Dr Vanlalthlana chuan ZPM an sorkar chuan pisa hrang hrangte hmun khata dahkhawmnaah chief minister office pawh sawn luh a nih tur thu a sawi.
Nimina ZPM Political Training neihah Dr Vanlalthlana chuan ram hmasawnna innghahna bulpui ber chu sorkar inrelbawlna tha (good governance) a nih thu a sawi a. “Tuna kan kal mek dan aia mumal leh awmze nei zawka kan kal a ngai a ni. Chutiang tur chuan ruahmanna fel tak kan nei tawh a ni,” a ti.
Dr Vanlalthlana chuan an sorkar a nih chuan ZPM chuan sectorization kalpuiin, hmasawnna a tak taka kalpui a nih theih nan sorkar department inhnaih zualte Minister pakhat hnuaiah dah a nih tur thu leh department inhnaih zual (Allied department) te pawh zirchian a, a theih anga pawhkhawm dan zawn a ngai tih a sawi a. Mizorama sorkar department 50 dawn thaw awm mek te inkarah thawh hona tha a awm theih nan leh awmze nei zawk a hmalak nan Convergence Policy hman a nih tur thu a sawi.
ZPM an sorkar chuan sorkar pisa-a thawkte tan leh a dawrtu mipuite tana awlsam zawk nan sorkar pisa hrang hrangte hmun khata dahkhawm (cluster approach management system) kalpui a nih tur thu sawiin Dr Vanlalthlana chuan, “Chutiang atan chuan sorkar hmun pawimawh dahkhawmna MINECO kan nei sa a, hetah hian Chief Minister Office pawh sawn luh a ni ang. Chutiang zelin district hrang hrang bakah Block level thlengin ruahmanna siam a ni,” a ti.
Dr. Vanlalthlana chuan, “Hetianga system felfai leh inrelbawlna awmze neia kan kal chuan, tuna kan buaina tam tak hi nasa takin kan tireh thei dawn a, eirukna theihna remchang tam tak tihbo a ni a, eirukna hi nasa takin kan veng thei dawn a ni,” tiin, ZPM chu eirukna do turin an inpeih a, a ngaihna pawh hre turah an inngaih thu a sawi bawk.