Premier League season thar Zirtawpni zanlaiah an khel a, champion Manchester City in bul tanin kaithar Burnley an hmachhawn.
League tan zanah City in season thar nimahsela engmah a danglam lo tih lantirin 3-0 in hnehna an chang a, an striker rinrawl Erling Haaland chuan goal hnih a khung nghal.
Nghah rei a ngai lo
Turf Moor-ah Man City captain hlui Vincent Kompany-a pawlten City an mikhual a, season liamta khan Championship-ah football hmuhnawm khel thin an nih avangin beisei a sang.
Nimahsela season hmasa a goal 52 khungtu Haaland-a’n goal khung turin second 185 bak a mamawh lo. Kevin de Bruyne ball cross chu Rodri-a’n a tauh thla a, Norwegian striker hian nang fuhin goal-ah a khung a. Minute 36-naah an goal hnihna chiang takin a khung belh.
Burnley an beidawng lo, second half thlengin theihtawp chhuahin an bei a, nimahsela minute 75-naah Rodri chuan City goal thumna a khung.
Lawm a kim lo
Hnehna chang mahse Pep Guardiola pawlte tan lawm a kim lo. Manchester City midfielder Kevin de Bruyne chu inhliam avangin inkhel atang minute 23 hnu lekah lakchhuah a ngai.
A hliam hi uluk taka an ennawn leh hnuah Guardiola chuan UEFA Champions League final a a hliam a neih tawh ang tho kha a nih thu a sawi. Hun engemaw chen a chawlh a ngai dawn.
“A vanduai a, a inhliam nawn lehnghal. A inhliamna hmun hi a ngai a, Champions League final a a inhliam ang tho kha a ni. A chawlh rei deuh a ngai ang.” a ti a.
Season liamta a goal 10 khung a, assist vawi 31 nei thei De Bruyne awm lohin City goal nawr a danglam thin, hei hi an hlauthawng ang. Chutihrualin insiamrem turin an coach Guardiola a ni miau a, squad an neih chhah bawk avangin mangan a la hun lo.
Gunners chak nghal
Manchester City elpui Arsenal in first half-ah Nottingham Forest lakah goal hnih an khung a, 2-1 in hnehna an chang.
Inrinni tlaiah Emirates Stadium a inkhelah hian Gunners tan English striker Eddie Nketiah chuan minute 26-naah goal hmahruai a khung a. Minute 32-naah Gunners winger Bukayo Saka chuan an goal hnihna mawi takin a khung.
Forest tan second half-ah substitute Taiwo Awoniyi chuan goal khat a khung ve bawk.
Arsenal manager Mikel Arteta chuan, “Match hmasa bera hnehna chan hi a awlsam ngai lo. Hmahruaitu nih kan phu a, mahse inkhel kan dahtha lo kha kan tuar. Premier League-ah chuan 2-0 hi dinhmun him a ni ngai lo.” a ti.
Newcastle United in goal nga khungin bul an tan a. Sandro Tonali chuan goal khung nghalin Aleksandar Isak chuan goal hnih a khung a. Callum Wilson leh Harvey Barnes ten goal dang an khung.