Hindu sakhaw kalpui na pawl chuan Haryana-a an buai hnuah eibar zawnna kawnga Muslim danchah leh khua atanga chhuahtir tumin hma an la mek.
July 31 khan Nuh district-ah Vishwa Hindu Parishad (VHP)-in sakhaw thil an huaihawt chu beih niin venhim hna thawktu mi pahnih telin mi paruk an thi.
Buaina hian district dang a kang kai nghal thuai a. Gurugram-ah chuan mosque hal niin puithiam thachhangdawltu, kum 22 mi, Mohammad Saad pawh thah a ni bawk.
Haryana police chuan buaina kaihhnawihah hian mi 312 an man tawh a, mi 106 an hreng mek bawk niin Haryana Home Minister Anil Vij chuan a sawi.
Sakhaw pahnih zuitute inkara tharum thawhna a thlen hnuah hian Hindu pawl hrang hrangin duh lohna an lantir zui tawh.
August 2-a Hansi district, Hansi khawpuia punkhawm an huaihawtah thusawitu pakhat, Krishna Gurjar chuan tual chhunga sumdawng zawng zawngte chu Muslim an chhawrte bân vek turin a ti a. A nih loh chuan an sumdawnna chu boycott-ah a vau.
Hindu kal na pawl pakhat, Bajrang Dal-a tel, Gurjar-a hian autorickshaw-a chuang chunga aurinna hmanga thu a sawiah hian, “Dawrkai, hnathawka Muslim chhawr luite dawrah chuan poster tarin kan sakhaw phatsantu tiin kan dah ang,” a ti a ni.
“Hindu dawrkar chauh hetah hian an awm tur a ni. Ni hnih hnuah Muslim dawr kan la hmu a nih chuan an chungah engpawh thleng se anmahni mawh a ni ang,” a ti bawk.
A hnuah Gurjar-a hian, “Pawn lam mi Muslim, a bikin Rohingya-te paih chhuah chungchang a ni ka sawi,” tiin thuthar lakhawmtute hnenah a sawi.
Hansi atanga Muslim umchhuah vek chungchang a nih leh nih loh zawhna chu, “Bajrang Dal hian tute mah tihthaih a tum lo va; mahse, Bajrang Dal hian hlauh a nei lo va, Hindu sakhaw tihthaih pawh a duh lo,” a ti.
Dan hre mi, Shahrukh Alam chuan court-ah inhuatna lam thu sawi chungchang khinna a thehlut a, Muslim sumdawnna danchah chu a dik lo niin a sawi.
“Heng an thil phutte hian he rama Muslim dikna chanvo tlemzia a lantir a, an duh angin khua leh district atanga chhuak turin an ti ngam hial a ni. Hetianga intih hian India ram himna a tiderthawng a. India danpuia fundamental rights bawhchhiatna a ni bawk,” a ti.
Police pawhin Hindu mite khawlaia an pungkhawm chu an en liam mai mai niin a sawi bawk.
“A chang chuan police-te hian punkhawmna a awm pawhin a sir atangin an en liam a. Hetiang huna police-in hma an la miah lo pawh hi Supreme Court thupek bawhchhiatna a ni,” a ti.
April, 2023 khan Supreme Court hian India-a state tin hnenah inhuatna lam thu sawi chu engmah complaint pawh ziak lut lovin man theih tiin thu a lo rem tawh.
Hansi-a Deputy Superintendent of Police, Virendar Sangwan chuan Al Jazeera hnenah Gurjar-a leh mi dangte lakah pawh ‘inhuatna thil an thlen vangin’ thubuai an ziak lut tih a sawi.
“Chhui zui mek a ni,” tiin Sangwan hian a sawi bawk.
August 6 khan Haryana-a Tigra khuaah lungawi lohna lantir a ni bawk a. Hindu-te chuan Gurugram district-a Anjuman Jama Mosque-a puithiam thachhangdawltu thattua puh man chhuah an phut.
“Gurugram-ah hian Muslim mipa za tel – mistiri, lu met, khawlaia inpho, thlai zuar, khawl siam leh cab khalh an awm a, anni hi kan buaina a ni lo; mahse, muanna an tichhia a nih erawh chuan khawi atang mahin thlawpna an dawng lo vang,” tiin Bajrang Dal hruaitu, Kulbhushan Bhardwaj chuan pun khawmnaah hian a sawi.
“Muslim-te hi he khawpuia an chengin hna an thawk tur a ni lo. Mi chengte pawh heng mite hi an in luahtir lo turin kan ngen a ni,” a ti.
Bhardwaj leh mi dangte lakah thubuai ziah luh zui a ni bawk.
Haryana-a district pathum – Mahendergarh, Rewari leh Jhajjar-a khaw 50 chuang hruaitute chuan August 3 khan thuchhuah siamin an huam chhungah Muslim sumdawng luh an phal lo.
Khaw hotuten thu an chhuahah hian, “Muslim-ten khuaah eng sumdawnna pawh thil zawrh, ransa zawrh leh kutdawh pawh phal a ni lo,” an ti.
Hetianga Muslim sumdawn phal lohna hi India Prime Minister Narendra Modi-a pawh Twitter-a zuitu pawl pakhatin an thlawp bawk.
Alam-i chuan hetianga thuchhuah hi dan kalh a nih thu a sawi.
“Hetiang thu ziah hi India inpumkhatna tihchhiatna leh bawhchhiatna a ni a, danpuiin a phal loh a ni. A ziaktute hi dan anga thuneituten an hrem ngei tur thil a ni,” a ti.
August 8 khan dan hre mi, Kapil Sibal pawhin Supreme Court-ah Muslim-te eibar kaihhnawiha boycott kalpui khinna thu a thehlut.
A tukah Hisar district-a lo neitu pawl chuan lungawi lohna an lantir zui a, mi sang tam tak an pung khawm.
“He lehkha chhuaha Muslim sumdawngte sumdawn phal loh hi dan lo a ni a. Khua zawng zawngin an pawm loh ka ring,” tiin lo neitu pakhat, punkhawmna huaihawttu zinga mi, Suresh Koth chuan a sawi.
Ram chhunga sakhaw hrang hrang – Hindu, Muslim leh Sikh zawng zawng pawh, sawiho turin a sawm bawk.