ZPM Working President K. Sapdanga chuan Pathian leh mipuite zara ZPM-in sorkarna a chan chuan a ngaih pawimawh hmasak ber tur chu kut hna thawktute hamthatna siam leh bana kaih policy hmanga eizawnna ngelnghet a tam thei ang ber thalaite dinpui a nih thu a sawi.
Inrinni khan Aizawl North III bial chhung tin tlawh chhuah thlir letna leh lawmthu sawi inkhawm chu Chanmari venga Vanneihtluanga inah neih a ni a. ZPM Working President chuan ZPM sorkar tun din a nih chuan kut hna thawktute thawhrim thlawn loh dan leh thalaite a tam thei ang tan eizawnna nghet siamsak chu a ngai pawimawh hle dawn a, budget session hmasa berah hemi pual hian sum serh hran a nih tur thu a sawi.
Aizawl North III ZPM candidate atana ruat, K. Sapdanga chuan MLA-ah thlan tlin a nih phawt chuan a bialah Local Development Committee (LDC) din a tum thu a sawi a. LDC hian veng chhung hmasawnna hna thawh tur leh thawh hmasak tur a thlang ang a, thawh dan tur a rel ang a, thawktu tur a thlang ang a, hna a vil zui bawk ang, a ti bawk.
Aizawl North III huam chhungah hian chhungkaw 5,300 vel an awm a, June 1 atanga fang tanin, August 11 khan an fang chhuak a ni.