England midfielder Jude Bellingham chuan a club thar tan duhthusam a tha in bul a tan a, goal a khung nghal bakah man of the match a thlan niin Athletic Bilbao lakah 2-0 in an chak.
Kum 20 mi hian tun nipui khan Pound maktaduai 88.5 in Borussia Dortmund atangin Madrid a pan a. Inrinni zan inkhelah Madrid tan hian minute 36-naah goal a khung.
Real Madrid tan kum 2007 a David Beckham hnua inelna a English mi goal khung leh thei hmasa ber a ni.
San Mames Stadium a inkhelah Los Blancos tan Rodrygo chuan goal hmahruai zawk a khung a. Inkhel a mit latu ber erawh Bellingham niin a goal khung bakah Real goal nawr a ti hlauhawm thin.
Real Madrid manager Carlo Ancelotti chuan, “Bellingham hi naupang duhawm tak a ni. Theihna sang tak a nei a, a zam ngai reng reng lo bawk. Thawhrimina a nei a, player tha tak a ni.”
“Kan kheltha tak zet a, chak tumna lian tak kan nei. Tun season-ah hlawhtlin ngei kan tum ruh hle. Zanin bikah akan thawhhona a tha a, mimal ni lovin a huhovin kan che tha hle. Goal venhim hi kan tan a pawimawh hle bawk.” tiin inkhel zawhah a sawi.
Los Blancos tana chanchin lawmawm lo erawh defender Eder Militao inhliam niin a khup na avangin lakchhuah a ni a. Pathianni khan a hliam hi endik nghal niin a khup a ti na a, zai ngai tur a ni. Los Blancos hian pre-season atanga chhiarin first team player pathum ‘cruciate ligament’ hliam avangin hun rei zawk chawl tur an nei tawh tihna a ni.
Inkhel dangah Real Sociedad in Takefusa Kubo goal khung an chakpui thei lova, Girona nen 1-1 in an inhnehtawk.