- LH Hauheng, Nghilhloh Run
Ni 100 a tling ta hial in ka hria, kan unau Kuki te leh Meitei te buaina hi, a reh a hnekin a la tang hle mai a, eng nge kan chinchang zel tur hi ni dawn ni.
Kan unau Kuki (Manipur)-te rorelna dik hnuaia an awm theih nan kan Zoram ngeiah pawh NGO’s -te buatsaihin kawng kan zawh a, kan tam nangiang mai. Kha kha kan unaute chunga kan duhsakna leh ram rorelna sang leh dinhmun tha zawk an neih/hmuh theihna tur atana kan duhsakna lantirna vawrtawp a ni. A mizo a, a kristian a, a tlawm mai mai dawn lo…
Ni a liam, thla a vei, kum kan chhiar chho mek zel a, chutih karah August ni 10, 2023 chawhnu a Parliament thutkhawm neih ah kan Mizoram aiawh, Tribal-te MP tia hriat hlawh, fak leh chawimawi phu, pa danglam tak mai—Rajya Sabha MP Pu K. Vanlalvena chuan Manipur buaina chungchang sawichhuakin Parliament House ah a thawm a mawiin, a che ropui hle a, a chipui a unaute tan Manipur Tribal te hi Myanmar mi an ni lo tih a au chhuahpui a, India ram, Zoram leh khawvel hmun dang a deng chhuak nghal anih kha maw…
Fak loh har, fak ngai si hi amah hian a awm tlat a, kan sawi zel mai a ni ang chu, keini ang state te tana parliament house a thusawi hi a harsat zia kan hria a, Mizoram ang state -te Rajya Sabha MP ve meuh a duh hun huna thu a sawi mai zel hi, dawt a ni lo, a tak chu a ni si a. Kan thang a mawi leh thin anih hi maw.
Pa lu-ruh ring tak, zirna lamah BA nimai kha a ni a, Sap tawng pawh nalh lutuk in a tawnglo, mahse, Parliament House meuha a Sap tawng kha Ram leh hnam himna atan a va hlu si em! A huaisenna hi ka fak a, a Mizo a, a kristian a, a thang tlawm lo —ka sawi tum in hriatthiam vek ka ring, mi huaisen Pu K. Vena tam takin ka fak e.
Ka ngaihtuah ta mai mai a, Mizoram MP tana thusawi ve theih ngailohna hmun ang deuh thaw a an ngaih, Parliament House ah hian vawi tam tum tam Pu K. Vena chuan thu a va sawi hnem ta em. I ram leh hnam issue ah hian vawi te khat mah hi a la tlan chhe ngai lo va, a tlanchhiat ka ring ngailo bawk. A sawi apiang hi kan ram leh hnam issue pawimawh tak tak ala ni zui zel nia maw le.
Mizo tlangval, kum lama la tunlai thalai tak mai ina kan Rajya Sabha inkhawm kal mek tihtawp a duh vang ni hauh si lo va tihtawp a han ni hi a ropui ka ti a, sawi nawn fo a nuam hle. Chairman hnenah thusawi a dil a, a thutnaah let leh turin a ti a, minute tam aliam hnuah thusawi turin Chairman in a ko, a sawm a; Rajya Sabha MP, Pu Vanlalvena Khawlhring a rawn ding a, Union Home Minister Amit Shah thusawi a rawn kheng nghal rap mai a, boruak a riring tan chho riau mai a, atukhum a tichhah sauh sauh a, Manipur a kan unaute thlavang hauhin ramdangmi kan ni lo tiin a han au a, Vai MP rual an hmel en reng renga vai kumhlun tur te an au rual dual dual a, a ri hum hum mah zawk a ni. Mizoram MP ka ni a, Tribal te MP ka ni, ti ngam ngat K. Vena hi khawvel hmuhin Mizo hnam te min va chawimawiin, parliament rorelna tihtawp a ni ta mai te hi Mizo hnam chhanna atan hriatreng a ni dawn a ni.
Khawvel hmun dang a cheng te hmuh theihin, khawvelah kan chanchin a au a, a puangzar anih mah zawk, Rajya Sabha MP nih hi chanchin tha rawngbawlnaah a ngai tel tlat a, a ram leh hnam tana thalo turah chuan inches khat pawh a tawlhsawn kan hre lo! Union Home Minister ina Manipur Tribal-te chu Myanmar mi an ni tia sawiah puhin Myanmar mi an ni lo va, British lo luh hmain kum 200 he ramah hian an lo awm tawh a, India Independence hmain rei tak an awm tawh a, Myanmar mi emaw, foreigner emaw an ni ngailo tih a au chhuahpui riap riap mai anih kha!!
Rajya Sabha (MP) Pu K. Vena chuan biak in 300 hal hi communist ramah pawh thleng ngailo world record thar anih thu a sawi a. A áwki a sán hlek a, Mizoram MP, Tribal MP anih thu au chhuahpuiin, “North East tlangram hi kan ta a ni a, humhalh turin hlauh kan nei lo” tih a sawi te hian Tribal MP, a thawk tawp ni thlenga Zofate tana ngaihtuahna senga a theihna sangber a ram leh hnam tana hlan tu a la ni zel dawn a ni.
A tul hun chuan huaisen leh khauh tak zelin – kan ram, kan hnam leh kan sakhua himna tur atan chuan nun tam nei turin nun hausa i nei tlat zel ang u.