Boxing world heavyweight champion tum hnih ni tawh Anthony Joshua chuan chung lam panin ke a pen leh tan a. Robert Helenius lakah chiang taka hnehna changin a champion kawnghren laklet tumin hmalam a pan.
Pathianni zingah London a O2 Arena-ah kum 33 mi British boxer hian round sarihnaah hnehna a chang a. Hemi hma zawng hian a khingpui hi zirchiangin chiang taka hnek tumin a nawr lo.
Fimkhur taka a veh thin hnuah a hun inhawng hmu in Helenius hi a kut dinglamin a hnek fuh chiang hle a, chhuatah tlu in kum hnih leh a chanve chhunga a vawikhatna atan knockout in Joshua a chak.
Hnehna a chan avang hian Joshua hian nakkum January-ah American boxer, a elpui ni reng thin Deontay Wilder chu a hmachhawn dawn a, hemi tur hian ruahmanna an nei tawh.
“Boxing hi chu infiamna danglam a ni a, thil a inthlak zung zung thin. Zaninah ka tih tur ka ti a, hei hi a pawimawh ber chu a ni.” tiin a chak hnuah Joshua chuan a sawi.