Philippines rama tlangkang reng thin pakhat, Taal an tih chu kang chhuak thar lehin nimin tuk khan chirh sa tak tak a phuh chhuak a, mi thiamte chuan a aia nasa zawk, mihring tan pawha boruak him lo chin ni thei pawh a la phuh chhuak thei niin an sawi.
Nimin tuk khawvar hma deuh khan Manila khawpui atanga km 70 vela hlaa awm, Taal tlang atang hian chirh sa chu nasa vak lovin a inphuh chhuak tan a. A hma lawkin meivap thahnem tak a phuh chhuak hmasa a, chhiatna lian zawk a thlen loh nan a bul hnaia cheng mi 8,000 vel chu sawn chhuah nghal an ni.
Taal tlang hi Philippines rama tlangkang mek (active volcano) zinga a nasat lama 2-na ni lai a ni a. Thliarkara dilah, dil lai vel taka awm niin khawvela tlangkang tê ber zinga a ni a, kum 450 liam ta chhungin vawi 34 zet a kang inphuh chhuak hi a thleng tawh.
Thuneitute chuan a bul hnaia province awm, Batangas-ah chuan ‘chhiatna lian thleng thei’ tiin inring turin an ti.
Philippine Institute of Volcanology & Seismology (Phivolcs) chuan, “Taal tlangkang mek hi a la inmung mek a, a chirh phuh chhuah hi a nasa lem lo va, chak tak pawh a ni lo va, khawpui leh tek tla nena tangkawpa insiam a ni,” an ti a. Phivolcs director Renato Solidum chuan, “Meivap, lung leh gas eng emaw zat, a khamphei zawnga darkar khata km 60 vela chak phuh chhuak ang chi chu a thlen a rinawm lo,” a ti.
Heti chung hian Phivolcs hi an fimkhur hle a, inralrinna (alert) an pek chhuah pawh 3 atangin 4-ah an kai tawh a, a hlauhawm ber hi 5 a ni.
Thuneitute chuan tlangkang hi ‘volcanic tsunami’ pawh a ni thei tiin an sawi a. A inphuh chhuah hnuah tuiah luang lutin chu chuan tsunami a thlen thei niin an sawi.