England captain Harry Kane-a’n German champion Bayern Munich a zawm fel a, an tan German Super Cup-ah a inkhel nghal.

Tottenham striker Kane hian amah siam liantu club a chhuahsan a, chona thar leh trophy lak theihna club pan a duh vang a ni.

Inrinni zanah a trophy hmasa ber lak theihna hun an nei nghal, mahse Bayern hi 3-0 in RB Leizpig lakah an tlawm. Kane leh trophy te hrang tura duan an la ni rih.

Chiang zawkin

Kum 30 mi Kane hian Euro maktaduai 100 in Bayern hi a pan a, a khelhdan a zirin pek belh tur a la awm.

Spurs tan match 435 khelin goal 280 a khung a. Nakkumah contract a neihlai hmang zo tur a ni a, free transfer a chhuak thei a nih dawn avangin Spurs lamin man tam zawka hralh theih laiin hralh an thlang ta zawk.

Spurs fans te a thlahnaah Kane chuan chona thar a hmachhawn a hun tih a sawi a. Bayern a zawm fel hnuah, “Khawvela club lian ber zing ami an ni a, ka inkhelh chhungin level sang berah fiahna hmachhawn a, ka theihna pholan ka duh thu ka sawi fo tawh thin. He club hi hlawhtlin tum reng thin a ni a. Ka zawm thei hi ka hlim hle.” tiin a sawi.

La champion lo Kane

Allianz Arena-ah German Cup champion lai tan Dani Olmo a che tha a. Goal tha vawi hnih a khung hnuah penalty atang a goal thumna khungin hattrick a siam.

Kane hi second half-ah dah luh niin inkhelah nghawng a nei thui lova, ball vawi thum chiah khawih hmanin Leipzig lakah Bayern in nidang an pha lo hle.