• Ruata

Electric scooter chak tha tak siamtu lar Ather chuan ramchhungah scooter thar pathum an tlangzarh leh ta a, heng scooter thar te hi 450S leh 450X chi hnih te a ni.

Ather electric scooter ho hi Mizoramah pawh kan hmu nual ta a. A hmaa electric lirthei ho lo chhuah tirha kan zawhna lian tak ni thin chu tlang ram tan a tha ve ang em tih hi a ni a. Ather scooter ho hi Mizoramah pawh kan han lei ve ta sup sup mai a, a lo chak tha em em mai a, a power pawh a sang tha viau a. Aizawl khawpui chhunga kawng chho ulh deuh angah te pawh midang phur chung pawhin a zo tha vak vak hle mai a, hei vang hian keini tlangram angah pawh hralh hi chu a kal chho zel dawn niin a lang a ni.

A thar ho chu le

Ather 450S thar hi Rs. 1,29,999 man niin 450X pakhat zawk, a battery pack hniam zawk hi Rs. 1,38,000 man a ni a, a battery pack sang zawk hi Rs. 1,44,921 man a ni thung a ni. Heng a man tarlan te hi ex-showroom, Bengaluru mil a ni a, Mizoramah chuan a danglam hlek awm e.

Ather 450S

Ather 450S pawh hi chi hnih awmin pakhat hian 2.9kWh a hmang a, a dang leh chuan 3.7kWh battery a hmang thung a ni. Heng baterry chi hnih te hi 6.4kW electric motor nen thlunzawm niin a speed limit chu 90kmph a ni a. Darkar 8 leh minute 36 chhungin a battery te hi a charge full theih a ni. Ather 450S hian 7.0 inch DeepView Display a nei a ni.

Ather 450X – 2.9kWh

He electric scooter thung hi chuan 2.9kWh battery pack neiin hei hi 5.4kW motor nena thlunzawm a ni a. Vawikhat charge full-in km 115 a thui a tlan thei a, a top speed chu 90kmph a ni thung a. A battery charge nan hian darkar 8 leh minute 36 tho a ngai a, he electric scooter hian 7.0 inch touchscreen a nei thung a ni.

Ather 450X – 3.7kWh

Hei hi battery pack lian zawk niin 6.4 kW electric motor nen thlunzawm a ni bawk a. Vawikhat charge full in km 150 a tlan thei a. Darkar 5 leh minute 45 chhung lekin a charge full theih a. A top speed hi chu 90kmph tho niin 7.0 inch touchscreen a nei bawk a ni.

Scooter thar pathum te hian thil thuhmun telescopic fork leh monoshock suspension te an nei a. Brake lamah pawh a hnung leh hmaah disc brake ve ve an nei bawk a, hei mai bakah hian combine and regenerative braking system an nei bawk a ni. 12 inch alloy wheel an nei vek bawk a a hmalamah 90/90 tyre leh a hnunglamah 100/80 tyre te an nei a, LED headlight an neih bakah thil dang hrang hrang tha tak tak an nei bawk a ni.

Ather electric scooter chhuak thar pathumte hian Pro pack duhthlan tur an nei a, hemi nei thei tur hi chuan Rs. 20,000 chawi belh a ngai thung a. Hetah hian coasting regen, ride stats, guide me home lights, theft notification, navigation leh inter-city parking te a awm a ni. Ather 450S hian riding mode pali – SmartEco, Eco, Ride leh Sport te a nei a. 450X hian riding mode 5 – SmartEco, Eco, Ride, Sport leh Warp te a nei thung a ni.

Ather scooter te hi petrol hmang scooter kan hmuh tam zawk ai chuan a to hret a. Hetihrual hian petrol a hman ve lohna te, in lama charge mai theih a nihna te, khawpui tana boruak bawlhhlawh a pe chhuak ve si lo leh a khawl chak tha tho bawk si avangte hian leitu an pung zel a ni a. Sorkar khuakhirhna khauh chho zel avang te pawhin kan la uar deuh deuh dawn niin a lang a ni.