Lok Sabha member C Lalrosanga chuan MNF party-in thil tha tia theihtawp an chhuah ve laiin beih tawk fo mah se hnenah an chang zel dawn tih a sawi.
Thawhtannia Mizo Hnam Run chhung inkhawmah thu sawiin C Lalrosanga chuan MNF party chu ‘Pathian leh kan ram tan’ titute an ni a, an lamah Pathian a tan tlat avangin MNF party beitute hriamhrei chher a sawt dawn lo tih sawiin, “Pathian zarah hnehna kan chang zel ang. Thil tha tia theihtawp kan chhuah ve laiin beih kan tawk fo a. Rilru nat chang pawh a awm ve thin. Mahse, diriam taka min beitute tawpna hi a ropui vak ngai lo,” a ti.
Delhi tlang boruak sawiin Lok Sabha MP chuan, thuin nasa takin an inkap reng a. Central leh Manipur sorkarin an tih tur an tih a ngai tiin na takin all party meeting-ah an sawi tawh a. MNF President Zoramthanga’n huai tur leh Zofate tana ding nghet tlat tura a tih angin theihtawp an chhuah niin a sawi.
NDA meeting-ah Manipur chungchang leh UCC chungchang sawi lan an phal loh avangin thu a sawi duh loh phah tih sawiin C Lalrosanga chuan, “A hnu lama MP inkoh khawmah pawh Manipur leh UCC chungchang sawi an phal loh avangin kan haw phah a. A hnu lam meeting-ah pawh kan tel duh loh phah zel a ni. Session-ah Manipur chungchang sawi ka tum reng a. Thusawi ka dilna chu a pil bo zel a, adjournment motion ka theh luh pawh hnawl a ni a. Ka nu ICU-a awm pawh ngaihsak thei loin, house-ah no confidence motion thlawp turin ka thu tluan parh a ni,” a ti.
Lok Sabha member chuan house-ah a hmui phuarsak mah se national media lamin Manipur buaina chungchanga an dinna an hriat avangin an bawr nasa tih a sawi a. “Na tak leh huai takin kan dinna ka sawi theih phah a. NDA lama kan thiante pawhin min be tha duh loin, chibai pawh ka dawng thei ta mang lo hial a ni. Chutihrualin, kan unaute an lawm em em a, lawmthu ka dawng nasa a, inpumkhatna pawh a ngheh zel phah niin ka hria,” a ti bawk.
Mizo Hnam Run inkhawm hi MNF Vice President Vanlalzawma’n a kaihruai a ni.