Chelsea leh Liverpool te league season bul an tannaah an intawng a, inkhel hmuhnawm takah 1-1 in an inhnehtawk.

Pathianni zana Stamford Bridge a inkhelah hian team pahnihten Brighton midfielder Moises Caicedo an duhna chhan chiang takin a lang ve ve. Ngheh lohna lai nei an ni ve ve a, hei tak hian inkhel a tihmuhnawm.

Liverpool in chan tha zawk ni hmasa in Mohamed Salah hmanga goal bar an tih per hnuah a ball pek ‘cial’ tak atangin Luis Diaz chuan minute 18-naah goal a khung.

Chelsea pawhin Liverpool tlarhnung an tihthaih ve fo a, tlarhnungah an phui lo ve ve.

Minute 37-naah mi thar Axel Disasi chuan Mauricio Pochettino pawlte si phurh a sut a, set piece-ah Liverpool tlarhnung a pherh.

Inkhel tawp thlengin team pahnihten chance an nei. Nimahsela goal an khung thei lova, Liverpool goalkeeper Alisson chuan Ben Chilwell leh Nicolas Jackson te goal khung tur a dansak a tha tak zet.

Beisei tur an nei

Inkhel tan hma in Caicedo boruak a lian. Liverpool in British football a player manto ber ni turin inremna an nei. Chelsea lamah kal a duh avangin Chelsea in British record ni turin an dawr zui ve leh.

Chelsea lamah hian kal ta se Mauricio Pochettino naute inkhel atangin inkhel thununna kawngah a pui nasa dawn tih a chiang reng.

Blues tan striker thar Nicolas Jackson a inringtawk a, beiseina siamtu a ni. Left-wing back Ben Chilwell a dam tha tawh, hlauhawm siamtu tho a ni.

Liverpool in defensive midfielder an mamawh. An tlarhnung tiphui tur leh attacking midfielder te mawhphurhna ti tlem sawttu tur an neih a ngai.

Hetihlai hian an goal nawr a hlauhawm. Mi thar Dominick Szoboszlai leh Alexis Mac Allister te an tlan hnem a, an ke atang ball tha a chhuak fo bawk. Tlarhmaah Mo Salah a la ‘class’ reng, a khelhthat laia Jurgen Klopp-a’n a la chhuak a lawm lo.

“Mo khan inkhel hmasa ber a goal khung ziah record a nei a, chhuah a duh lo kha ka hrethiam. Mahse kha kha ka ngaihtuah lo. Kan inrem ngheh a ngai a, tha thar kan mamawh avangin ka thlak a ni.” tiin a sawi.