India hmar lam, Uttar Pradesh-a court chuan nikuma Dalit tleirawl unau hnih pawngsual leh thah thubuaiah mipa pahnih chu dam chhung lung in tang turin a hrem.
Mi dang pahnih pawh finfiahna tichhiaa puha thiam loh chantir niin kum ruk ve ve tang tura hrem an ni bawk a. Heng hremna pekte hi high court-ah an khin erawh a rinawm.
Nikum September thla khan tleirawl pahnih hi Lakhimpur district-ah thinga khaia hmuh an ni.
Rawng taka an chunga chetna hi ram pum a luah a, khawvel hmun hrang hrang atang pawhin sawi a hlawh hle bawk.
Police chuan mi paruk an man a, an zinga pali hi Zirtawpni khan thiam loh chantira hremna pek an ni a. Pahnih erawh kumtlinglo an nih avangin an chungthu rem hi la tihkhawtlai rih a ni.
Zirtawpni khan special court, Protection of Children from Sexual Offences (Pocso) Act tlawhchhana rorelna chuan mi pali zinga pahnihte hi mi ruk bo, mi man beh luih leh hmeichhe thata puhnaah thiam loh a chantir.
Thawhtanni khan Judge Rahul Singh chuan he pawikhawihna hi ‘vâng tak zingah pawh a vâng ber’ tiin a sawi a, mi pahnihte chu dam chhung tang turin a ti a, ‘an thawk tawp thlengin’ a ti kher bawk a. Rs. 41,000 ve ve chawi turin a ti bawk.
Unau pahnih, kum 17 leh 15 mi hi September 14 khan an chenna, Tamoli Purva khuaa an in bul lawkah an ruang hmuh a ni a. An khua hi state khawpui, Lucknow atanga km 200 chuanga hla a ni.
An ruang hmuh atanga darkar 24 pawh tling lo chhungin police-in rinhlelh parukte hi an man nghal vek a ni.
Police chuan an mi man zinga thenkhat leh tleirawlte hi inthian an ni a, an bike-in ‘an phur chhuak’ niin an sawi a. A hnuah an pawngsual a, an phuar hlawm a, inneihpuiah an sawm lui a, a hnuah thingah hian an khai ta a ni.
Tleirawl chhungte hi chuan an fanute hi an in atanga ruk chhuah niin an sawi ve thung a, chhui a nih dan chu an duhkhawp chiah lo.
Police hian a titua puh pakhat chhungte chuan an fapa chu tanin eng pawi mah a khawih lo niin an sawi tlat bawk tih an sawi.
Zirtawpnia court-in puitling palite hremna a puan hnuah hian prosecution lawyer Brajesh Kumar Pandey chuan kumtlinglo pahnihte chungthu chu nakinah la ngaihtuah tur a nih thu thuthar lakhawmtute hnenah a sawi.