Vawiin hi India ramin ramdang lak atanga zalenna a neih champha a ni a. India ram pumah lawm a ni leh dawn a. Sawrkar ni pawimawh ber anih avangin he ni hi kumtin urhsun taka hman a ni thin.
Hemi niah hian India national flag chu sawrkar hmun pawimawh zawng zawngah lawmna entir nan zar leh tur a ni a. Tunhma chuan sawrkarin national flag hi a dah pawimawh em avangin mimalin duh duha zar ngawt pawh phal a ni lo. Ni pawimawh bik leh hmun pawimawh bikah chauh zar phal a ni thin nghe nghe. Mahse, kum 2002 atang khan dan chu thlah zalenin miin an duh huna an zar phal a ni ta a. Hlimna leh lawmna hmunah te mimal tupawhin zar phal a ni ta bawk. Tunah chuan sawrkar lamin mipuite chu India flag zar uar turin min zirtir ta zawk a ni.
India flag a rawng chi thum heng a sen eng, a var leh a hring bakah a laia thil bial hian awmzia an nei vek a. A chung bera a sen eng hian India chakna leh ropuina a entir a. A laia a var hian remna leh muanna, dikna duh a ni tih a entir a. A hnuai bera rawng hring hian India ram ram hmasawn leh ram tha a ni tih a entir bawk. A laia thil bial Chakra(bial a chhunga inzawm kual) hian mihringa nunna leh chakna hi a inzawm kual vek a ni tih a entir bawk a ni.
India flag hian a entir tam ber chu India ram hi ram nuam, mitin zalenna nena hlim taka an lenna, mitinin zalen taka ama duhzawng a thawh theihna ram tha leh nuam a ni. Ram zalen anih angin sakhuana thilah pawh mitinin ama duhzawng sakhua a biak phal a ni vek tih a entir a ni.
Hetiang hi India ram lo dintute thinlung anih lai hian khawvel inlumlet leh hmasawnna kal chho mekah India ram inlumleh dan, sakhaw zalenna te nekchep zawnga rorelna awm ta nia an hriat hian India ram inpumkhatna a nghawr nghing ta niin an sawi a. India danpuiin a phal sak ang sakhaw zalenna chu a sakhaw vuantu nei tam ber Hindu sakhaw betute chuan hnawk an ti a. Sakhaw tenau zawkte nekral an nih theihna tur dan chu zawi zawiin an zam chho zel bawk. India flag in a ken tel muanna pawh chu a bo telh telh bawk niin a lang. State hrang hrangah sakhuana innek ral tumna chhungrila intham chuan muanna a hliahkhuh a. Nitinin India flag rawng thil tum chu a bo hret hret niin mi tam tak chuan an ngai bawk. Hetiang boruak a lo awm tak avang hian Mizoramah ngei pawh India flag zar chu mi tam takin an châk lo niin hriat a ni. Mizote hian a hma daih atanga ram dang nia inhriatna kan nei sa bawk nen, hetiang thinlung a lo pian theihna tura hma latu sawrkar thuneitu kan nei ta mai hi a vanduaithlak takzet a. Sakhaw atchilhna avanga mipui thinlungah helna rilru a lo chhuak anih pawhin mipui dem tur an awm lova. India ram dintute thil tum kan kalsan avanga thinlung nâ infawkkhawmte siamtu hi dem tur a ni ngei ang.