Aizawl: BJP Mizoram Vice President T Zakunga chuan mipuite hi dawt hmanga inbumnate leh an insawithaih nasat avangin Mizoramin hma a sawn loh phah niin a sawi.
Nimin khan BJP chuan chawlhkar thar inhlanna leh political session an nei a. He huna thu sawitu T Zakunga chuan Mizote mi dang thusawi thu dik a ni em tih chhui zui miah lo a, insawithaihna te, dawt hmanga inbumna te avangin hlauh loh tur an hlauh phah a, tul miah lohah an buai phah thin tih sawiin, “Hei vang hian kan thlen tur ang pawh kan thlen theih loh phah a ni,” a ti.
MADC-a MDC ni bawk T Zakunga chuan BJP hi insawithaih luih luih ang an ni lo tih mipuite pawhin an hre tha duh lo va, intihthaiha an kual an kual chhung hian thenawm state-ten Mizoram an tlansak mek tih a sawi a. State dangte anga hmasawn ve hi an chanvo a nih avangin party mi te pawh an insiamrem a, tan an lak a ngai tih a sawi.
BJP Mizoram Vice President chuan thawhchhuah nei lo state nih avangin Mizoram mipuite hian an dinhmun siam tha thei tur party an belh thiam a pawimawh tih sawiin, “UT leh State sorkar hnuaiah kum 50 tal tap party hrang hrang kan hotu ten min kaihruai tawh a, kan dinhmun ni ta chu kawthnathawktute retheih berna state leh mirethei leh hausa in kar zautak awmna kan ni mek a, sorkar ang pawhin leiba ngah ber state kan ni chho ta,” tiin, mipuite retheihna leh harsatna hrechiangtu, a ram mipui te an nih avangin an dam khawchhuahna tur party BJP an belh a ngai tih a sawi bawk.