Mizoram Pradesh Congress Committee (MPCC) chuan Lok Sabha MP C Lalrosanga’n NDA sorkar rintawk lohna motion a thlawp thu a sawi chu rin harsa an tih thu an sawi.
Nimina thuchhuah an siamah MPCC chuan parliament-ah Manipur buaina chungchanga BJP kaihhruai NDA sorkar rintlawk lohna (no-confidence motion) sawiho a nih khan PM Narendra Modi thusawiah Manipur buaina chin felna lam hawi engmah a awm loh avanga eptu party intelkhawm, I.N.D.I.A. atanga MP-ten parliament an chhuahsan avangin speaker-in voice vote hmangin thutlukna a siam tih tar langin, “Pu C. Lalrosanga pawhin NDA thutna lama thu chungin, voice vote lak laiin sorkar rintawk lohna motion a thlawp niin a insawi a. Hei hi video record hriat tur a awm lo a ni,” an ti.
MPCC chuan Lok Sabha MP C. Lalrosanga’n central BJP kaihhruai NDA sorkar rintawk lohna motion a thlawp tih thu hi ama sawi chauh mipuiin an hriat thu sawiin, “Citizenship Amendment Bill-ah Mizo mipui hnena a insawi loh dana a lo awm tawh avangin tuna a thil sawi pawh hi a ni ngei em tih rin a harsa hle a ni,” tiin, BJP kaihhruai NDA sorkar a thlawp lo takzet a nih chuan NDA chhuahsan mai hi thil nih dan tur zawk a nih thu an tar lang.
Congress party chuan BJP kaihhruai NDA leh NEDA an duh loh takzet chuan Lalsawta kaihhruai Congress party hmalaknaa din, Mizoram Secular Alliance-a lo tel ve turin MNF-te sawmin, “Kan ram, kan hnam, kan sakhua a him theihna turin Congress party chuan theihtawp chhuahin hma a la zel dawn a. Mizorama party dang zawng zawngte pawh BJP rorelna paih thlak a nih theih nana Congress party rawn thawhpui turin kan sawm a ni,” an ti bawk.