Barcelona in an tum angin La Liga season bul an tan lova, Getafe nen inkhel boruak sang takah goal inpe lovin an inhnehtawk.
Coliseum Alfonso Pérez a Pathianni zana inkhel hi a boruak a sang a, team pahnihte chak tuma inbei an indim lo. Red card tum thum phawrh a ni a, pakhat chu mikhual team manager Xavi Hernandez pek a ni.
Barcelona chu chan tha zawk ni hmasa in first half-ah an langsar a. Brazil winger Raphinha chu an player hlauhawm ber niin dinglam kil atang goal hlauhawm a chhuak nasa. Minute 36-naah a goal khung tur Getafe goalkeeper David Soria chuan a dansak hram.
Minute 42-naah Raphina hian Gastón Álvarez a kiu a a nghawk avangin red card a hmu a. Minute 57-naah Jaime Mata chuan Ronald Araujo laka yellow card a hmuh nawn avangin hnawhchhuah a ni ve bawk a. Minute 71-naah Barca manager Xavi chuan referee thutlukna a sawisel avangin red card hmuh a ni.
Inkhelah thil thleng a tam avangin minute 20 lai pek belh a ni a, a tawp thlengin goal erawh a lut lo tluan.
Inkhel zawhah Xavi chuan, “Referee kha khatiang thlen tirtu kha a ni. Foul en liam a ngah lutuk tih sawiin ka sawisel a, kha vang khan min hnawtchhuak.” a ti bawk.