Myanmar hmar lama lung man tam chi khat, jade laih chhuahna khura chirh tawlh avangin mi 30 vel chin hriat lohvin an awm mek.
Kachin state-a tlangram khua, Hpakant hi khawvela jade mine lian ber ber leh hlu ber ber awmna hmun a ni.
Chirh tawlh tuartu tam ber hi tual chhung mi, mahni remchan anga tlang awih panga hna thawk leh khur kalsan tawha cheng an ni tlangpui thin.
Myanmar-ah hian May leh October thla inkarah hian fur ruahtui tam lai a nih avangin lei min hlauhawm leh rapthlak tak tak a thleng fo thin.
July, 2020 khan helai hmunah tho hian lei min nasa tak avangin mi 162 vel an lo thi tawh a, kum 2015 khan mi 110 chuang an thi tawh bawk.
Fur lai hi chuan thil laih chhuah hi chawlhsan a ni thin a, hetih rual hian tun tum chhiatna hi Pathianni tlai dar 3:30 pelh hnua thleng niin mahni thua jade zawnga vak chhuakte a chhilh ta a ni.
Company lian tak takten an laihna leivung chu chhah leh thui takin tlang awihpangah a inzam a, metre 150 chuanga sangte a ni a. Hei hi ruah a sur hian a nem a, a tawlh ta mai thin a, a chunga miner awmte chu a hnawl ta thin a ni.
Dam chhuakte chuan jade zawnga an laih mawlh mawlh laiin chirh, lung leh tuihawk tam takin a len tih an sawi.
Myanmar-ah hian heng lai vel hi thil laih chhuahna khur, enkawl uluk si loh tamna a ni a. Heng hmunte hi an ram chhung kil tin atangin hnathawk hiptu niin khawvela lung mawi man tam ber pawl, jade zawngin an phu suau suau thin a, an hmuh chuan China-ah an hralh thin.
Chhanchhuah hna thawktu zinga pakhat chuan mi 34 chuang chin an hre l mek tih Associated Press a hrilh a, mi pariatin hliam tuarin damdawi ina dah an ni tih a sawi bawk.
Mi zawn leh chhanchhuah hna thawk mek zel a ni a, hetih lai hian miner thenkhat chu jade zawngin an bur leh nghal der tawh a ni.
“Tun thleng chuan ruang hmuh kan la nei lo,” tiin thawktu pakhat chuan a sawi.
Jade laih chhuah hi Myanmar-a sipai sorkar sum hnar pakhat a ni a. Hnam bil pawl pakhat, Kachin Independence Army te chawmtu ber a ni tel bawk.
Kum tam tak chhung chu sipaite leh Kachin helho hi Kachin state-a jade mine an duh avang hian an indo tawh a, kum khatah $ tluklehdingawn 30 zet thawk chhuak theia chhut a ni.
Kum 2021-a sipaiten Aung San Suu Kyi-i kaihhruai mipui sorkar paih thlaa an rama thuneihna an chan leh hnuah phei chuan an inbei nasa zual.