Prime Minister Narendra Modi chuan vawiin khan ama siam chhuak ngei, Arjun Main Battle Tank (Mark 1A)-te chu sipaite hman turin Army Chief General MM Naravane hnenah Chennai-ah a hlan.
Modi-a hi Tamil Nadu-a sorkar programme pawimawh tak tak hawng turin vawiin khan Chennai a thleng a. He state hi kumah assembly an inthlang dawn.
Modi-a hian tank hmanga amah chibai bukna a chhang a. He tank hi Defence Research & Development Organisation (DRDO) hnuaia Combat Vehicles Research & Development Establishment-in Chennai-a an duan leh an siam a ni tih news agency PTI chuan a tar lang.
Tun hnai lawka defence ministry-a thuneitu sangte thukhawm chuan Indian Army hnena an hman tura Arjun Mark 1A tank 118 zet hlan tur hian a pawm a, Rs. Vaibelchhe 8,400 man nin news agency ANI chuan a tar lang.
Prime minister hian km 9-a thui, Chennai Metro Rail leh rel kawng dang pahnih a hawng a. IIT, Madras-a Discovery Campus sakna tur lung a phum bawk a, hei hi Rs. Vaibelchhe 1,000 senga sak tur a ni a. Anaicut Canal chei thata thuam mawina tur hna thawh tur lung a phum bawk.
Tamil Nadu hi kumin kum tawpah hian an inthlang dawn a. January 30 khan BJP chief JP Nadda chuan rorel lai, AIADMK nen an thawk dun dawn tih a lo sawi tawh a. Kum 2019 Lok Sabha inthlanpuiah khan BJP-AIADMK an lo tang dun tawh a, bial khatah chiah an chak a ni.