Sorkar laipui dawra Delhi-a cham mek, Rural Development Minister Lalruatkima chuan nimin khan Ministry of Rural development hotute dawrin Mizoram mamawhte a thlen.
RD Minister Lalruatkima hian nimin khan Ministry of Rural development hnuaia rural housing lam changtu, Deputy Director General (RH) Gaya Prasad chu a pisa-ah hmuin a kawm a. An inkawmnaah hian Mizoramin a mamawh mi rethei leh harsa zawkte tana insak tanpuina (rural housing) chungchanga harsatna tam tak Mizoramin a tawhte a sawipui a. Deputy director general hian tun chawlhkar chhungin Mizoram tan Rs. 60 crore pek chhuak nghal a nih tur thu RD minister hi a hrilh.
Thawhtanni vek khan RD minister hian ni 100 inhlawhna changtu, Amit Kataria, Joint Secretary, Ministry of Rural Development pawh a pisaah a kawmin Mizoram mamawhte a sawipui.
An inkawmnaah hian tun karah Mizoram mamawh ang RD minister-in a thlente chu rawn tih ngei a tum thu a lo hrilh a. Kataria hian Mizoram chu tehna hrang hranga (perimeter) India ram state-te zingah ni 100 inhlawhna kalpui tha ber pawl a nih avangin state-in a mamawh ang tihsak vat vat a phurawm thu a sawi a, hma lam hunah pawh inthlahrung hauh lova mamawhte a bula thlen zel turin a chah bawk.
RD minister-in ministry a dawrnaah hian ni 100 inhlawhna kalphungah Aadhaar Card nei lote chu inhlawhna an pek ve theih tawh dawn loh thu ministry lam hian an lo hrilh a, hei hi a rang lama hma an rawn lak tur thu an lo hrilh bawk.