• Rinfela Zadeng

August ni 10 – 11, 2023 khan Synod Campus Ministry te hi kan sikul, Presbyterian English School, Cherhlunah rawngbawlna nei turin kan sawm a. He kan hun hman dan leh an rawngbawlna hi a that em avangin tun tumah hian Synod Campus Ministry te rawngbawl dan leh a tangkaina te sawi zui kan tum a ni.

Synod Campus Ministry chanchin tawi

Synod Campus Ministry hi kum 1988 Synod chuan zirlaite luh chilh zawnga rawngbawlna siam tura rawtna lo lut chu pawmin kum 1989 ah pawm a ni a. A taka hman tan erawh chu kum 2006 a?angin a ni a, chuta tanga hmasawn chho zelin kum 2013 atangin committee member te ruatin vawiin thlengin Pathian khawngaihnain rawngbawlna an kalpui a. Zirna in hrang hrang – University, College, Higher Secondary School, High School, Elementary School leh educational institution hrang hrangah te leh Mizoram pawn thlengin rawngbawlna hi a tul dan ang zelin an kalpui a ni.

Pawl bik awm lo rawngbawlna

Synod Campus Ministry hi Mizoram Synod ta nimah se, pawl ram/denomination anga rawngbawlna kalpui an ni lo a; zirlai naupangte hnenah Pathian thu hrilh kha an thupui ber a ni. Pathian thuawih mi thiam chher chhuah hi an tum ber a ni a. Hetiang lama mi thiam bik te ruaiin sikul naupangte rilru mil tawk turin thu leh milem/video hmangin zirtirna an pe a. Kristian kan nih angin Pathian thu atangin engkim an teh a, chutianga nunga hmalam pan zel turin zirlai naupangte chu thahnem ngai takin an fuihin an zirtir a ni. A bîk takin pawl I – VIII zirlaite tan phei chuan a pawimawh zual hlein ka hria a; hetih hun lai hi mihringin nun bul kan tanna tak tak leh kan hmalam hun hriltu hun pawimawh lai ber a nih avangin.

Ngaihsan tur dik, LGBTQ, Zuk leh hmuam, Sex, Mobile phone/internet

Ziralai naupangte hnenah ngaihsan tur dik leh kan hmalam hun zel tur atana tangkai an zirtir a. Kan nu leh pa te hi kan zahin kan ngaisang tur a ni tih chu an thuchah ken lian tak a ni a; anmahni avanga sikul kal thei kan nihzia te an hrilh chiang hle. Tin, vawiina kan buaipui mek LGBTQ (Tuai/Patil) te pawh an hrilh ngun hle a. Mipa naupang chu mipa ni ngar ngar turte, hmeichhe naupang pawh hmeichhia ni ngar ngar turin Pathian thu hmangin an fuih a. Pathianin Adama leh Evi – mipa leh hmeichhia bak a siam loh thu atanga bul tanin, kan ngainat zawng leh kan tui zawng te erawh a danglam theih thu min hrilh. Zuk leh hmuam hi ruihhlo kan tih tanna bul a nih avangin, chutiang laka fimhlim tur leh ruihhlo bawiha awm lo turin min fuih a. Pathianin rui sain min siam lo a, ruihhlo tih hi sual a nih thu min hrilh bawk. Sex/mipat hmeichhiatna hi nupa karah chauh hman tur a nihzia te Pathian thu atangin min hrilh a; internet/Social Media/Mobile phone te pawh a awm tawk hmang turin min fuih nasa hle.

Nu leh pate

Zirlaite chauh min fuih lo a, nu leh pate min ko khawm a; kan fate enkawl dan tur min hrilh nasa hle. Naupang ngaihsan tlaka nun te, mobile phone khawih tir reng lo tur te, kan fate hrechiang tur tein min fuih a. Zirchianna/research behchhanin – naupang, an nu leh pate hnena harsatna sawi ngam lo an tam zia te min hrilh a. Chuang chuan rilru lam natna/depression, mahni intihlum/suicide te a thlen nasat thu te min hrilh bawk a. Kan fate theihna leh thiamna hriat chian te, mi dang te nena bûka khaikhin reng lo tur te leh Pathian thu nena uluk taka enkawl an ngaihzia min hrilh bawk. Kan fate hi kan bulah naupangchhia angin awm mah se engkim – nulat tlangvalna kawng te hi an hre vek tawh a ni tih te min hrilh a. Hei hian kan fate kan enkawl dan turah nasa taka min puih theih a rinawm a; nu leh pate hi kan fate tana entawntlak nih a tulzia leh naupangte ngihsan ber ‘Super Hero’ kan nihzia pawh kan inhriat a ngaihzia min hrilh bawk.

Zirtirtute min fuih

Keini zirtirtu ngei pawh min fuih a; naupangte enkawl dan tur leh an harstna te hrechiang turin min fuih a. Naupang rilru mila enkawl turin leh an theihna leh thiamna te sawrchhuahsak turin min fuih a ni. Entawn tlaka nung turin zirtirtu min fuih a; kan zirlaite tana ngaihsan tlaka nung turin leh theihtawp chhuaha zirna leh thiamnna pe turin min fuih a ni. Zirtirtu si – zu ngawl vei, kal tha peih lo, nun uluk lo, ai kal la reng mai leh chawlh thlahlel em em tan chuan zirlai nuapang tha tak neih hi a theih dawn loh tih a langchiang hle. Zirtirtu ber a that lohna ram leh hnam reng reng chu ram ropui leh hnam ropui an ni ngai dawn lo tih pawh thil chiang sa a nihzia kan hrethiam nghal awm e.

Lo sawm ve rawh u

A tira kan sawi ang khan Synod Campus Minstry te hi Mizoram Synod ta nimah se Kohhran pakhat zirtirna anga Pathian thu hril an ni ve lo a; Mizoram puma zirna in zawng zawng hi an bial a ni a; a duh apiang tana sawm theih an ni. Zirna in tha, zirlai tha, nu leh pa tha, zirtirtu tha kan nih theihna tura theihtawp chhuaha Pathian thu hmanga rawngbawlna nei an ni a. An thu sawi zawng zawngte hi kan zawm vek thei lo a nih pawhin kan zawm theih chinah pawh hlawkna tur leh hmasawnna tur tamtak a awm a ni. Chuvangin kan zirlai naupangte atanga ram leh hnam siam tha tura bul kan tanna turah hian Pathian a pawimawh ber a; chumi atana kawng min kawhhmuhtu Synod Campus Ministry te hi kan sikul leh zirna ina sawm hi bul kan tanna tur a ni.

Khawvelah hian Pathian thu leh zirna bak hi mihring nun thlak danglam thei a awm lo. Chuvangin Pathian tih tlattu mi thiam leh mifing kan ngah hunah chuan kan ram leh hnam hian kan duh lo chung chung pawhin hma kan sawn ang.