Aizawl : ZPM Vice President Lalthansanga (Chatea) chuan an party in kalphung thar – mipui sorkar bak zawrh tur an neih loh thu a sawi.
Thawhtannia ZPM chhung inkhawmah thusawiin Lalthansanga chuan, “Sorkar kalphung a dik lohin miretheite’n an tuar thin a, state dang zara nung ve chauh kan nih avangin kan thalaite’n rual an awt a, chuvangin thalaite leh mirethei zawkte’n ZPM an rawn zawm chur chur a ni,” a ti.
ZPM chuan kalphung thar – mipui sorkar tih bak zawrh tur an neih loh thu sawiin Lalthansanga chuan, “Kan that bik vang leh fel bik vang ni lovin, mite’n ZPM-ah beiseina sang tak an nei mek a ni. Tawngtai pawlte’n chhum lo chat lovin he ram tan an tawngtai reng a, ram mipuite’n kan ram a lo dam theih nan tawngtaina an hlan reng bawk,” tiin, kalphung thar mipui sorkar din tumte pawhin an dawn thleng an zauh zel a, seat engzat nge an lak ang tih hre lo mah se, Pathian leh ram mipuite zarah an sorkar ngei a rin thu a sawi.
ZPM Adviser J Laldinliana kaihhruai chhung inkhawmah hian ZPM party tana Lalthachungnunga hla phuah ‘Engtin Nge I Chhan Dawn?’ tih chu ZPM Leader Lalduhoma’n a tlangzarh bawk.