Aizawl : Aizawl North II bialtu MLA Dr Vanlalthlana’n nimin zing dar 7 khan Aizawl Theological College-in Independence Day an lawmna ah khuallian niin a hmanpui.
Aizawl Theological College-in Independence Day an lawmna hi Rev Dr. R.Tlanghmingthanga, Principal ATC in a kaihruai a, khuallian Dr. Vanlalthlana’n flag pawt pharhin, College tual zawlah hun hman zui a ni.
Khuallian Dr. Vanlalthlana chuan thusawiin, “New Delhi lama ram impumkhatna chungchang sawi a nih laia ram chhung buaina kan neih dan kalhmang hi a inhmeh lo va. Thusawi leh thiltih in ang lo lutuk hnuaia India ram hruai a ni mek hi a pawi ka ti tak zet a. Independence Day vawi 77-na champhaphak hmu thei tawh leh hmasawnna nasa tak nei tawh inti si hian ram chhungah hnam tlem te intibuai kan tudai thei lo hi chu thil inhmeh lo tak a ni,” a ti.
Kohhran mite hian dan siamtu MLA te endikna sahal atan dan an ngaih pawimawhna leh harsatna hrang hrang an neihte sut kianna atana dan an siam belhte hi hmang tawh tura ngenin Dr Vanlalthlana chuan, “Kohhran hruaitu kal khawm hian kan dan neihte tihdanglam emaw, thil tha zawk nia kan hriatte chu dan hmang bawka kenkawh dan tur ngaihtuah thin se la. Draft Bill te hi mithiamte nena tangkawpa siam a, kan ram siam thatna atana politician te kaih harhna atana hman a thain ka ring a ni,” a ti bawk.
ATC hi Rev. D.E. Jones hovin kum 1907 a din a ni a, tunah hian Non-teaching staff 34, Teaching staff 31 leh zirlai 203 an awm mek a ni.