Aizawl : Hachhek bialtu MLA Lalrindika Ralte chuan nimin khan ‘Hringnun Buanzawl’ tih lehkhabu, Makimi Khiangte ziah a tlangzarh.
Synod Conference Hall-a tlangzarh inkhawmah Lalrindika Ralte chuan natna leh mangannain a phuar chunga mi tam takin an tih theih loh lehkhabu tha tak, mi dangte tichak thei a ti chhuak chu malsawmna a ni a, a tha zawnga danglamna nasa tak thlen thin a ni, tih sawiin, “Pathianin damna min pek hlutzia ngaihtuah ila. A tangkai thei lang berin kan hmang tur a ni. Manganna leh harsatna hian mihring a tuaihriam a, a tifing thin. Dinhmun leh a din hi kan duh a, mahse, mihringin kan tlin lo foa, a chauh phah der theih. Pathian ringtu nih chuan tuarna leh channa hi hmalam min pantir tu a ni,” a ti.
Lehkhabu thlirlawkna neitu Lalremruata Renthlei, The Aizawl Pawl Joint Editor chuan, he lehkhabu hian Pathian hmangaihna zau zia, thuk zia leh rinawm zia a tarlang tih sawiin, “Kum 10 chuang cancer natna in a phuar leh Covid-19 in tum thum ngawt a sawp chunga rilru eng leh beiseina nghet tak put chu Pathian atang lo chuan thil theih a ni lo,” tiin he lehkhabu hi mi tam tak chakna pe thei lehkhabu a nih thu a sawi.
Hringnun Buanzawl hi phek 191 a chhah, Rs 200 man a ni.