Prime Minister Narendra Modi chuan India ram khawthleng, mipui rorelna leh ze hrang hrang awm a lo suangtuah thin dinhmun a thleng turin theihna a nei tih a tilang tih a sawi.
India-in zalenna a neih champha vawi 77-na lawmna pui ber, Red Fort-a Thawhlehnia ram mipui hnena thuchah a sawiah Modi-a chuan India thanna leh hmasawnna chuan khawvel pum rinhlawhah a chantir leh mek tih a sawi.
Prime minister chuan India ram thanduanna chu khawpui lian – Delhi, Mumbai leh Chennai ang chi chauh thawhrah ni lovin, khawpui tenau deuh zawk (tier-2 city)-te pawhin ram thanna turin ang khat rengin tha an thawh tih a sawi.
Modi-a chuan thalaite hnenah, “‘Remchanna a awm lo,’ ti suh u, in duh ang remchanna pe tur che u-in ram a inpeih a ni,” a ti.
Modi chuan Manipur buaina pawh sawi langin ram chu an kiangah a awm reng tih a sawi a. “Chawlhkar liam taah hmarchhaka tharum thawhna, a bik takin Manipur-a thil thlengah mi tam takin nun an chân a, an tuar nasa hle,” a ti a. “Helai hmunah hian zawi zawiin muanna a lo kir leh mek,” a ti.
“Manipur-a buaina chin felna chu muanna a ni a, sorkar laipui leh state sorkarin a tul ang apiang tiin a ti zel dawn,” a ti.
Prime minister hian ramin zalenna a sualnaa tha thawhtute a hriat reng thu leh an hmaah zaha a kun thu a sawi a. “Chhungaw member vaibelchhe 140 zet, khawvela mipui rorelna ram lian ber leh a mi cheng tam zawng pawha lian berin vawiin hian zalenna kût kan lawm a ni,” a ti.
Prime minister siam that, chet chhuah leh siam tharnain ram a thlak tih a sawi a. “Mihring vaibelchhe 140-te theihna hian khawvel duh lam hawi a thlak thei,” a ti.
Modi-a chuan tunah hian khawvelin India theihna leh hawi lam chu a thlir thup mek niin a sawi a. “Sorkar chetna leh pawisa che zawng zawng hi khua leh tuite tana thatna tur zelin a kal a ni,” a ti.
Sorkar leh khua leh tuite chu rilru hmun khat, ram dah hmasak thinlung pua an kal thu leh chu chuan rah tha tak a chhuah tur thu a sawi.
Prime minister hian kum 2014-a sorkarna a chelh khan India hi khawvel eibar dinhmunah ram lian 10-na a ni tih a sawi a. “Vawiinah erawh chuan Indian vaibelchhe 140-te inpekna avangin pangana a ni tawh,” a ti.
Eirukna thlarau sual chu um bo niin a tul lova sum kal ral thin tihtawp a nih thu a sawi a, “Kum nga chhungin mi rethei vaibelchhe 13.5 chuang chu rethei bakberh atangin chhungkaw dinhmun pangngaiah an awm hman a ni,” a ti.
Modi-a hian sorkarin thla tharah Vishwakarma Scheme a hawn dawn thu leh hei hi traditional skill atan a ni dawn a, Rs. Vaibelchhe 1,315 sum ruahman a nih thu a sawi a. Jan Aushadhi Kendra pawh 10,000 atangin 25,000-ah tihpun a ni dawn tih a sawi bawk.
Lo neihna kawnga an thawhna avangin lo neitute chungah lawm thu a sawi a. Kuthnathawktute pawh an hna avanga India an tihtunlainaah lawm thu a hrilh bawk.
Khawvel chu Covid atangin a la dam fel lo va, indona avangin buaina a awm leh mek bawk tih Modi-a chuan a sawi a. “Tunah hian khawvelin thil man sang tuar mekin khawvel pum eibar a nghawng a. India chuan thil man sang thunun turin theihtawp a chhuah,” a ti.
“Sorkarin khua leh tuite tana zangkhaina turin rahbi a tuk a, a tuk zel ang,” a ti.
Modi-a hian rel tihchangtlun niin Vande Bharat leh bullet train a ti thar zel a, khawpui lian intlawhpawhna pawh a pung zel tih a sawi a. Internet pawhin khaw tin a thleng tawh tih a sawi.
India-in hma a sawnnaah hian pawimawh tak chu hmeichhiate kaihhruaina hnuaia hmasawnna a tel dawn thu a sawi a. “Vawiin hian India hian inchhuak takin pilot a ngah ber a, hmeichhe scientist-ten Chandrayaan mission-ah hma an hruai bawk a. G20 ramte pawhin hmeichhe kaihhruai hmasawnna hi tha an ti em em a ni,” a ti.
Prime minister hian India chu Covid vaccine dose vaibelchhe 200 pe tawhtu a nih thu a sawi a, 5G pe chhuak chak ber a ni a, kum 2030-a tihpuitlin tura dah renewable energy pawh 2021-22 chhungin tih theih vek a nih thu a sawi bawk.
Kum 25 chhung lo sawi tawh, parliament building thar pawh a sak zawh hun tura sorkarin a bituk aia hmain parliament complex neih hman a ni tih Modi-a hian a sawi bawk.
Sipai lamah pawh hmasawnna a awmin an naupangin indo tur pawhin an inpeih reng tih a sawi a. “Tun hma kha chuan mipuiin bomb puak chungchang an ngaithla thin a, vawiinah erawh chuan ram hi a him tih ngaihdan an nei tawh,” a ti a. Himna leh muanna a awm chuan hmasawnna lamah rilru a sawrbing theih niin a sawi bawk.
Modi-a hian kum 2047-ah chuan ramin a zalen kum 100-na a lawm dawn tih a sawi a, “Hetih hunah hian tricolor flag hi ram changkang India tricolor flag a ni tawh ang,” a ti.
Kum 2047-a ram changkang India tih chu suangtuahna mai ni lovin, Indian vaibelchhe 140-te thutlukna a nih thu a sawi.
Prime minister chuan, “Ramin a suangtuahna a tihhlawhtlin nan chuan ei rukna, induhsakna leh intlawhna phur rit hi a bo a ngai,” a ti a. Heng thilte hi ‘sual pathum’ tiin a sawi bawk.
“Ei rukna hian India theihna nasa takin a tichhia a, a do tura a pumhluma kan inpek a ngai,” a ti a. Sorkarin scheme chi hrang hrangah a dawngtu tur tak ni lo, a lem vaibelchhe 10 an paih chhuah thu leh dik lo taka thil neih man chhuah chu a let 20-a a pun thu a sawi a. “Intlawnna politics hian khawtlang a tina a, ram hian eirukna ang chi hi a eng ang chi pawh kan hnualsuat a ngai a ni,” a ti.
Modi-a hian kum nga lo awm leh tur chu beisei phak baka hmasawnna hun leh kum 2047-a nih tum atana tha thawh hun a nih tur thu a sawi a. “Kan vaiin tha zawk ni tur leh chhuan thar thang tha kan nih theihna turin mawhphurhna lian tak kan nei theuh a ni,” a ti.
Prime minister hian Red Fort a thlenin Defence Minister Rajnath Singh, Minister of State for Defence Ajay Bhatt leh Defence Secretary Giridhar Aramane ten an lo dawngsawng a. Defence secretary hian General Officer Commanding (GoC), Delhi Area, Lieutenant General Dhiraj Seth te a lo hmelhriattir.
GoC Delhi Area hian Modi-a hi Saluting Base-ah hruaiin Inter-Services leh Delhi Police Guard ten chibai an lo buk a. Hemi hnu hian zahna chibai buktute a endik zui.
A endik zawhah prime minister hian Red Fort panin defence minister, minister of state for defence, Chief of Defence Staff General Anil Chauhan, Chief of Army Staff General Manoj Pande, Chief of Naval Staff Admiral R Hari Kumar leh Chief of Air Staff Air Chief Marshal VR Chaudhari ten chibai an lo buk.
GoC, Delhi Area bawkin hnam puanzar a pawh pharhna hmun turah a hruai zui leh a ni.
Puanzar a pawh pharh zawhah puanzar hi ‘Rashtriya Salute’ pek zui a ni a. Army band, JCO pakhat leh rank dang 20-te awmna chuan hnam hla an tum zui a. 8711 Field Battery (Ceremonial) hmangin zahna entir nan laipui vawi 21 kah chhuah a ni bawk.
Hnam puanzarh a pawh pharh rual hian prime minister chungah hian Indian Air Force ta, Advanced Light Helicopters Mark-III Dhruv pahnihin Line Astern Formation hmangin pangpar an thlak nghal.
Pangpar thlak zawh hian Modi-a hian ram mipuite hnenah thuchah a sawi zui a ni.
Red Ford-a Independence Day lawmnaah hian khawvel hmun hrang hrang atangin mi 1,800 sawm an ni a. Heng Special Guest zingah hian vibrant village an tih 600 chuang atanga Sarpanch 400 chuang te, farmer producer organisation s scheme hrang hrang aiawh mi 250 te, Pradhan Mantri Kisan Samman Nidhi Scheme leh Pradhan Mantri Kaushal Vikas Yojana chhawrtu mi 50 te, Central Vista Project-a thawktu mi 50 te, ramria kawng siamtu mi 50 te, primary school zirtirtu te, nurse te leh sangha mantute pawh an tel.