Lebanon hmar lama Akkar-ah Pathianni tuk khan tuialhthei phur lirthei a puak a, mi 20 vel thiin tam takin hliam an tuar niin Lebanese Red Cross chuan a sawi.
Lebanese Red Cross chuan mi 79 vel hliam tuar an awm thu leh damdawi inah dah luh an nih hlawm thu a sawi.
Akkar-a damdawi ina thawk, Yassine Metlej chuan ruang pasarih vel an dawn tawh thu leh kang hliam thahnem tak an buaipui thu a sawi bawk.
“Ruang lo thlengte hi an kang nasa hle a, tunge an nih hriat mai theih pawh an ni lo,” tiin AFP hnenah a sawi.
“Thenkhat chu an hmai a kang chhe vek a, thenkhat erawh an bân a bung bawk,” a ti.
An damdawi in chuan hliam tuar eng emaw zat chu hmun dangah an tir tih a sawi a, kang nasa lutuk enkawlna tur an nei lo niin a sawi.
Sipai leh venhim hna thawktu dangte chuan Lebanese sipaiten gas an thuhrukna hmun atanga sem darh tura lirtheia an hlan laiin a puak niin Reuters news agency hnenah an sawi.
National News Agency chuan a puah lai hian a bul hnaia chengten gas lak tuma an inhawr khawm lai niin mi 200 vel an awm niin a hmutute chuan an sawi.
Sipaite hian mipui nena an innawr buai hma leh a puah hma lawkin an kalsan niin an sawi bawk.