European football a player langsarte inhliam avanga chawlh rei ngai an pun belh zel a. Arsenal defender lei thar Jurrien Timber chu a inhliam enfiah a nih hnuah zai a ngai dawn a, a khup a ‘anterior cruciate ligament’ a tih nat avangin a chawl rei dawn.
Kum 22 mi hi Inrinni a Nottingham Forest nen an inkhelh tumin minute 50-naah lakchhuah a ni a. Thla hmasa khan Ajax Atangin Pound maktaduai 34 in Gunners hi a zawm.
Arsenal chuan, “Timber hi hun engemaw chen chhung a inkhel thei dawn lo.” tiin an sawi a. A chawlh hun chhung erawh an sawi lang lo. Nimahsela a khup hliam anga hliam hi a lo berah thla ruk vel tak an chawl thin nia ngaih a ni a. Hei vang hian kuminah a inkhelh leh a rinawm tawh lo.
“Kan club a mi zawng zawng leh medical team ten kan ngaih pawimawh ber chu Jurrien-a inenkawl dam leh a ni a, tha taka a dam leh a, a inkhelh leh vat theihna hi kan dah hmasa ber.” tiin an sawi bawk.
Netherlands international hian Community Shield khan Manchester City hmachhawnin Gunners tan football a khel tan tawh a. Beiseina sang tak nei chungin Mikel Arteta pawlte a zawm.
Season liamta khan Ajax tan inelna hrang hrangah vawi 47 a inkhel a. UEFA Champions League group stage a an inkhel zawng zawngah bul a tan vek.
Kum 2021 leh 2022 khan Eredivisie title an lakna kawngah tlarhnung a mi pawimawh zingah a tel.
Tun season thar inbuatsaihna leh tan a nih tawh hnuah khup hliam avanga chawlh rih ngai an thahnem hle a. Premier League lamah Aston Villa midfielder Emi Buendia leh defender Tyrone Mings te pawh an tel.
Hetihlai hian Manchester City midfielder Kevin de Bruyne chu mal ah tihrawl hliam avangin thla li vel a chawl dawn bawk.