Aizawl: Chief Minister Zoramthanga kaihhruaiin nimin khan hmarchhak state pangaa mau behchhana industry-te tihchangtlun dan tur ruahmanna sawi ho a ni.
He hmalakna hi National Bamboo Missions-in Asian Development Bank nena tangkawpa hmarchhak state panga – Mizoram, Tripura, Meghalay, Assam leh Nagaland-a mau behchhan industry-te nasa taka tihchangtlun leh thawhhotir tumna ruahmanna niin, thutkhawmah hian Mizorama kalpui dan tur chungchang an sawi ho a ni.
CM Conference Hall-a thutkhawmah hian he hmalakna hi Mizoramin tangkai thei ang bera a hman theih nan leh ram mipuite’n hlawk taka an chhawr theih nan, tuna mau hmanga industry kalpui mektute nena inrawnkhawmna neih leh phawt nise an ti a. Anni te nena hmalak ho theihte bakah hmalak theihna dang la awmte nen kimchang takin a rang lama project theh lut an rel a ni.
Thutkhawmah hian K. Lalthawmmawia, Commissioner & Secretary, Horticulture Department chuan National Bamboo Missions in Asian Development Bank sum hmanga hmalak a tum dan tlangpui leh Mizoram chhunga hmalakna tura State Bamboo Missions te mawhphurhna turte, department dang kaihhnawih awm thei ang chite a sawi fiah a. C.H Lalmuanpuia, Missions Director, Mizoram State bamboo Missions leh Horticulture Director ni bawk chuan hemi hmalakna atana ruahmanna an neih tawh chinte a sawifiah bawk.
He hunah hian Dr. K. Pachhunga, MLA, Vice Chairman, Bamboo Development Board leh Dr. Renu Sharma, Chief Secretary bakah sorkar mi pawimawh dangte an tel.