Indian Mujahideen firfiak pawla mi, Ariz Khan chu Delhi police officer thattua puh a nih vangin Thawhtanni khan Delhi Saket Court chuan thi turin a chungthu a rel.
Kum 2008 khan Batla House, South Delhi-a police-te leh Mujahideen hel hote inkahnaah Inspector Mohan Chand Sharma a thi a, mi dang pahnih an hliam.
He hmun atang hian Ariz Khan hi police-ten an man hmain a tlan bo hman a. February, 2018 khan Delhi police Special Cell-ten Azamgarh, Uttar Pradesh-ah an man ta chauh a ni.
Kum 2008 a Delhi, Rajasthan, Gujarat leh Uttar Pradesh chhehvela a bomb eng emaw zat puakah khan an hotupa ber nia puh a ni bawk.
“Hetiang thubuai hi thleng khat takte ai pawha thleng khat zawk,” titu Additional Sessions Judge Sandeep Yadav chuan Thawhtanni khan Khan-a chu Rs. nuai 11 chawi turin a ti a. Rs. nuai 10 chu Inspector Mohan Chand Sharma chhungte hnenah hlan nghal turin a ti bawk.
Batla House inkahnaa Khan-a tlanbopui, Shahzad Ahmed chu kum 2013 khan man a lo ni tawh a, dam chhung lung in tang turin a chungthu rel a ni.
An thurualpui dang pahnih, Atif Amin leh Mohammed Sajid te chu a hmunah an thi.